Yr heddlu’n rhoi cyngor diogelu eiddo

Mae’r heddlu yn Sir Drefaldwyn yn ymchwilio i nifer o achosion o ddwyn a byrgleriaeth wledig ar hyd y ffin â Gorllewin Mersia.

Yn ystod y mis diwethaf derbyniwyd adroddiadau o wyth o achosion a oedd yn cynnwys dwyn offer pŵer a chyfarpar fferm.

O ganlyniad, mae’r heddlu’n cynghori preswylwyr i gymryd rhai camau syml fel nad ydynt yn dod yn ddioddefwyr byrgleriaethau neu ladradau.

Meddai’r Arolygydd Matthew Price

“Bydd swyddogion lleol yn targedu gweithgarwch amheus ar hyd y gororau a byddwn hefyd yn gofyn i breswylwyr adrodd am unrhyw bobl/gweithgarwch amheus i’r heddlu. Byddwn yn annog preswylwyr i sicrhau eu bod yn gosod marciau diogelwch ar eu heiddo a’u pethau gwerthfawr ac yn eu cloi o’r golwg.”

“Does dim problem fawr gyda byrgleriaeth yn ein hardal. Fodd bynnag, gall diffyg diogelwch yn gyffredinol ganiatáu i ladron ddod i mewn i’ch cartref neu eich adeiladau allanol. Os ydych yn cymryd yr amser i asesu diogelwch eich cartref, yn dilyn peth cyngor defnyddiol ac yn gweithredu’n gadarnhaol, gallwch ostwng y perygl o ddod yn ddioddefydd.”

Gostyngwch y perygl o ddioddef byrgleriaeth drwy sicrhau eich bod wedi cymryd y camau diogelu syml hyn:-

• Gosodwch gloeon cadarn ar eich drysau a’ch ffenestri a sicrhewch eich bod bob amser yn eu cadw wedi eu cloi yn llwyr.
• Ceisiwch wneud i’ch cartref edrych fel petai rhywun yno os ydych i ffwrdd o’ch eiddo dros nos. Buddsoddwch mewn plygiau amseru ar gyfer lampau a radios.
• Ystyriwch osod larwm byrgleriaeth. Gall larwm byrgleriaeth sydd wedi ei osod yn gywir atal lleidr, a gall gweld bocs larwm y tu allan i’ch cartref fod yn ddigon i wneud iddynt ailystyried.
• Rhwystrwch dresmaswyr rhag cyrraedd cefn ac ochr eich cartref drwy osod ffens neu giatiau cryf
• Peidiwch byth â gadael allwedd sbâr mewn man cuddio cyfleus fel dan fat drws, mewn pot blodau neu y tu ôl i fric lac - mae lladron yn gwybod mai dyna’r lle cyntaf i edrych
• Defnyddiwch oleuadau allanol sy’n synhwyro symudiad
• Os ydych yn ailosod drysau a ffenestri neu’n prynu rhai newydd, sicrhewch eich bod yn cael rhai sy’n cyrraedd y Safon Brydeinig BS7950 (ffenestri) a PAS 24-1 (drysau)
• Gosodwch gadwyn neu far ar y drws a thwll sbïo, a defnyddiwch nhw bob tro mae rhywun yn galw.
• Sicrhewch fod cloeon o ansawdd da wedi eu gosod ar eich sied a’u bod yn cael eu cloi yn ddiogel. Dylid gosod cloeon ar ffenestri.

“Yn llawer rhy aml mai pobl yn dioddef byrgleriaeth gan fod eu cartref yn cael ei adael heb ei ddiogelu, nid oes larwm wedi ei osod ac mae ffenestri a drysau’n cael eu gadael heb eu cloi,” ychwanegodd yr Arolygydd Price. “Gall cymryd rhai camau syml i’ch diogelu eich hun a’ch eiddo rhag trosedd nid yn unig wneud i chi deimlo’n fwy diogel, ond gall hefyd ostwng eich siawns o ddod yn ddioddefydd trosedd”.