Nofiwr yn euog o droseddau rhywiol yn erbyn plant

Mae Heddlu Dyfed-Powys wedi croesawu euogfarn Tom Piggott am droseddau rhywiol yn erbyn plant.

Mae Piggott, 21 oed, o Faesowen, y Trallwng, wedi gwadu dau achos o dreisio plentyn, tri achos o ymosod yn rhywiol ar blentyn, dau achos o annog plentyn i gymryd rhan mewn gweithred rywiol, a thri achos o dynnu lluniau anweddus o blant.  

Ond cymerodd llai na hanner awr i’r rheithgor ganfod Piggott yn euog o’r 10 cyhuddiad yn dilyn achos llys 5 diwrnod yn Llys y Goron yr Wyddgrug.

Dywedodd y Ditectif Gwnstabl Steve Williams ei fod yn falch o waith caled swyddogion o ran ymchwilio i’r achos hwn a chreu ffeil o dystiolaeth anorchfygol yn erbyn Piggott.

“Bu’r ymchwiliad yn fenter enfawr i bawb a oedd yn gysylltiedig ag ef,” meddai. 

“O’r tîm ymchwilio, i’r ymchwilwyr cyfryngau digidol, bu’n llawer iawn o waith, ond yr ydym yn fodlon y bu’n werth yr ymdrech i gael cyfiawnder ar gyfer y dioddefwyr ifainc hyn.

“Ni fyddai dim o hyn wedi bod yn bosibl heb eu cryfder a’u dewrder yn dod ymlaen.

“Eu parodrwydd nhw i ddweud y gwir am yr hyn a wnaeth Piggott iddynt sydd wedi arwain ato’n cael ei euogfarnu.

“Dangosodd Piggott drahauster rhonc wrth ddweud celwydd i geisio cael ei hun allan o’r sefyllfa yr oedd ynddo o ganlyniad i’w weithredoedd erchyll. Ond profodd y dystiolaeth yn rhy gryf.“

Daeth swyddogion o hyd i 141 fideo, y mae 58 ohonynt yn y categori mwyaf difrifol, a 29 delwedd anweddus, y mae 6 ohonynt yn y categori mwyaf difrifol, ar ddyfeisiau electronig yr atafaelwyd o gartref Piggott.

Ychwanegodd y Ditectif Gwnstabl Williams: “Roedd rhai o’r delweddau y daethpwyd o hyd iddynt ar ei ddyfeisiau ymysg y gwaethaf yr wyf wedi’u gweld mewn gyrfa hir yn ymchwilio i droseddau fel hyn.”

Bydd Piggott yn cael ei ddedfrydu yn Llys y Goron yr Wyddgrug ar 13 Medi.

+++ Gall unrhyw un yn ardal Heddlu Dyfed-Powys sydd wedi’i effeithio gan droseddau fel hyn gysylltu â gwasanaeth dioddefwyr a thystion Goleudy, hyd yn oed os nad ydyw wedi rhoi gwybod i’r heddlu am y troseddau hyn. Cewch hyd i’r manylion cyswllt fan hyn: Sut allwn ni helpu - Goleudy - Goleudy (goleudyvictimandwitnessservice.org.uk)