Cofeb Newydd i Anrhydeddu Swyddogion Heddlu Dyfed-Powys a fu Farw

Bydd swyddogion a staff heddlu dewr o Heddlu Dyfed-Powys a heddluoedd eraill ar draws y wlad, a fu farw wrth amddiffyn y cyhoedd, yn cael eu coffáu mewn cofeb barhaol a fydd yn cael ei dadorchuddio ddydd Mercher 28 Gorffennaf yn y Goedardd Goffa Genedlaethol yn Swydd Stafford.

Ffrwyth ymrwymiad Ymddiriedolaeth Coedardd Goffa’r Heddlu yw Cofeb Heddlu newydd y DU. Sefydlwyd yr ymddiriedolaeth yn 2014 er mwyn codi arian ar gyfer adeiladu teyrnged addas i ddewrder ac ymrwymiad pawb o’r gwasanaeth heddlu sydd wedi ymrwymo eu bywydau i’n diogelu. 

Mae’r deyrnged efydd, sy’n mesur 12 medr o ran taldra ac yn sefyll mewn ardal 25 medr sydd wedi’i thirweddu, yn cael ei dadorchuddio’n swyddogol mewn seremoni gysegru arbennig. Bydd cannoedd o westeion, a fydd yn glynu wrth gyfyngiadau sy’n gysylltiedig â’r haint coronafeirws, yn bresennol yn y seremoni, gan gynnwys pwysigion, gwleidyddion uwch, cynrychiolwyr o bob gwasanaeth heddlu ledled y wlad, elusennau heddlu, a theulu a ffrindiau swyddogion a gafodd eu lladd ar ddyletswydd. Bydd y cyhoedd yn medru gwylio’r seremoni’n fyw ar-lein drwy’r wefan goffa www.ukpolicememorial.org o hanner dydd.

Ers 1749 a sefydlu Rhedwyr Bow Street fel gwasanaeth heddlu cydnabyddedig cyntaf y wlad, mae bron 5000 o swyddogion a staff heddlu wedi marw wrth blismona ein cymunedau. Bu farw mwy na 1500 drwy weithredoedd treisgar. Mae tyllau siâp dail ar y gofeb yn rhoi’r argraff o ddail yn syrthio er mwyn cynrychioli gwasanaeth, aberth, a bywydau a gollwyd. 

Dywedodd y Dirprwy Brif Gwnstabl Dros Dro Emma Ackland:  “Drwy gadw’r cof am y rhai sydd wedi mynd o’n blaenau’n fyw, mae Cofeb Heddlu’r DU yn anrhydeddu’r dewrder ac yn cydnabod y pris uchel a dalwyd gan y rhai a fu farw wrth gyflawni eu dyletswydd. Gadewch iddynt orffwys mewn hedd a’n hysbrydoli i roi mwy ein hunain.”

Dywedodd Syr Hugh Orde, Cadeirydd yr Ymddiriedolwyr: “Bydd dydd Mercher nesaf yn ddiwrnod hanesyddol ar gyfer ein gwasanaeth heddlu. Ar ôl 7 mlynedd o godi arian a 12 mis o adeiladu, o’r diwedd, medrwn gyflwyno’r gofeb hardd ac eiconig hon sy’n talu teyrnged i ddewrder ac aberth yr holl swyddogion ac aelodau staff heddlu hynny sydd wedi talu’r pris eithaf.

“Fel cenedl, mae ein dyled yn fawr i bawb sydd wedi aberthu eu bywydau i’n cadw’n ddiogel a’n gwarchod rhag niwed. Bydd y gofeb hon yn sicrhau bod y cof am y swyddogion a staff hynny sydd wedi marw’n parhau am byth.”

Y Goedardd Goffa Genedlaethol yw man coffa’r genedl drwy gydol y flwyddyn ar gyfer ein holl wasanaethau. Mae’n gartref i bron 400 cofeb sy’n procio’r cof, gan gynnwys Cofeb Genedlaethol y Lluoedd Arfog, ac yn denu dros 300,000 o ymwelwyr bob blwyddyn.

Am ragor o wybodaeth, galwch heibio i www.ukpolicememorial.org. Gall y cyhoedd wylio’r seremoni gysegru a chymryd rhan o bell drwy fewngofnodi i’r wefan goffa o hanner dydd ddydd Mercher 28 Gorffennaf 2021 a galw heibio i’r dudalen ‘Seremoni Gysegru’.