Cyhoeddi Heddlu Dyfed-Powys yn Bartner Cyflogwr y Flwyddyn gan Goleg Gŵyr Abertawe

Ar ddydd Gwener 2 Gorffennaf 2021, cynhaliodd Coleg Gŵyr Abertawe eu Gwobrau Myfyrwyr Blynyddol 2021 ac enwi Heddlu Dyfed-Powys yn Bartner Cyflogwr y Flwyddyn.

Roedd y digwyddiad, a gynhaliwyd yn rhithiol, yn cydnabod dawn newydd, datblygol, gydag enillwyr yn dangos ymroddiad ac ymrwymiad mewn llu o brentisiaethau ar draws amrediad eang o ddiwydiannau.

Fe wnaeth Coleg Gŵyr Abertawe, sy’n gweithio gyda dros 1,000 o gyflogwyr ar draws Cymru a Lloegr, hefyd ddathlu cyflogwyr sydd wedi dangos ymrwymiad i ddatblygu eu pobl.

Meddai’r Cyfarwyddwr Sgiliau a Datblygu Busnes, Paul Kift: “Llongyfarchiadau anferthol i Heddlu Dyfed-Powys, Partner Cyflogwr y Flwyddyn Coleg Gŵyr.

“Mae eu hymdrechion i gefnogi eu staff ac i uwchsgilio’u staff wedi eu cydnabod eleni wrth iddynt gael eu henwebi yng Nghategori Cyflogwr Mawr y Flwyddyn yng Ngwobrau Prentisiaethau Cymru.”

Roedd digwyddiad Coleg Gŵyr yn dathlu Wythnos Prentisiaethau Cymru, ac yn dilyn Gwobrau Prentisiaethau Cymru Llywodraeth Cymru, lle cyrhaeddodd Heddlu Dyfed-Powys y rownd derfynol yn ngwobr Cyflogwr Mawr y Flwyddyn  - y gwasanaeth heddlu cyntaf erioed i gael ei enwebi!

Ychwanegodd Mr Kift, “Y mae hyn nid yn unig yn dangos eu bod yn gyflogwr gwych, ond y mae hefyd yn amlygu eu bod yn rhannu ein hymrwymiad i ddatblygu dawn ar bob lefel ar draws sefydliad. Mae Heddlu Dyfed-Powys yn sefydliad ffantastig, maen nhw’n bartner rhagorol ac mae’r wobr hon yn haeddiannol iawn.”

Meddai’r Uwcharolygydd Ross Evans, Pennaeth Dysgu a Datblygu, Heddlu Dyfed-Powys: “Rydyn ni wrth ein bodd o dderbyn y wobr hon ac rydyn ni’n falch iawn o’r bartneriaeth rydyn ni wedi ei hadeiladu gyda Choleg Gŵyr dros nifer o flynyddoedd.

“Mae cael cynifer o staff yn dilyn cyrsiau ac yn datblygu eu sgiliau yn werthfawr iawn i’r unigolion ac i’r sefydliad.

“Hoffwn gydnabod cyfraniad y Cwnstabl Angela Williams sydd wedi symbylu portffolio prentisiaeth Heddlu Dyfed-Powys. Mae bod â dros 200 o staff ynghlwm â rhyw fath o hyfforddiant prentisiaeth yn cynrychioli dros 10% o’n gweithlu. Mae’r rhif hwn yn codi pob blwyddyn, sy’n dyst i symbyliad ac ymrwymiad y Cwnstabl Williams, ynghyd â’r bartneriaeth ragorol rydym wedi ei datblygu gyda Choleg Gŵyr”.

“Hoffwn ddiolch i bawb yng Ngholeg Gŵyr am eu cefnogaeth i’n staff ac am ein helpu ni i wella plismona a gwasanaethau cyhoeddus ar draws Dyfed a Phowys. Rydyn ni’n edrych ymlaen at barhau ein cyd-lwyddiant mewn blynyddoedd i ddod.”