Gwaith tîm swyddogion yn achub bywyd dyn a oedd yn gwaedu’n drwm

Achubodd meddwl chwim a gwaith tîm fywyd dyn a oedd yn gwaedu’n drwm ar ôl iddo gael ei amau o fod wedi pwno ffenestr.  

oedd Ben Cole a Caryl Walters, Rhingylliaid Gwirfoddol gyda Heddlu Dyfed-Powys, ar batrôl ar Stryd y Prior, Aberteifi, pan aeth dyn a oedd yn gwaedu’n drwm o’i arddwrn i fyny atynt yn ystod oriau mân y bore ddydd Sul 4 Gorffennaf.   

Roedd y swyddogion yn medru gweld bod yr anaf yn ddifrifol, a bod llawer o waed ar ddillad y dyn ac ar y llawr o’i gwmpas.

Drwy roi gwybod am y sefyllfa dros y radio ac esbonio’r argyfwng, roedd swyddogion eraill Aberteifi’n medru mynd yno i helpu.

Roedd y cwnstabliaid heddlu Dion Gibby ac Adam Hope gerllaw, a rhedasant i leoliad y digwyddiad.

Roedd gan y rhingylliaid gwirfoddol becyn trawma’r heddlu wrth law, ac roedd Cwnstabl Hope, sy’n Dechnegydd Meddygol Maes y Gad y Lluoedd Wrth Gefn gydag Ysbyty Maes 203 (Cymru), yn medru rhoi rhwymyn tynhau o gwmpas yr arddwrn.

Dywedodd Cwnstabl Hope: “Pan glywais mai gwaedlif rhedwelïol ydoedd, es i’r lleoliad yn syth.

“Gwelais ddyn ifanc yn dal ei arddwrn, a oedd yn gwaedu’n drwm, ac roeddwn yn medru gweld ei fod yn dioddef oherwydd yr holl waed yr oedd wedi colli’n barod.

“Gofynnais iddo barhau i roi pwysau ar y clwyf, a chadw ei fraich i fyny.

“O ystyried yr holl waed a oedd wedi rhedeg dros ddarn 5 i 10 medr o’r palmant, a bod yn rhaid inni aros am ambiwlans, yr oeddwn yn gwybod bod yn rhaid inni weithredu’n gyflym.”

Tra bod y dyn yn cadw ei fraich i fyny er mwyn ceisio arafu’r gwaedu, cymerodd Cwnstabl Hope rwymyn tynhau o’r pecyn trawma a’i lapio o gwmpas y clwyf cyn rhoi clwt amdano.

Roedd y rhwymyn tynhau’n llwyddiannus, heb unrhyw waed yn dod trwyddo.

“Ychydig yn ddiweddarach, fodd bynnag, ymddangosodd fel pe bai’r claf yn gwaethygu o ran pa mor ymatebol ydoedd, felly gosododd Cwnstabl Gibby a minnau ef yn yr osgo sioc,” meddai Cwnstabl Hope.

“Roedd swyddogion eraill o orsaf Aberteifi ar gael i helpu i ofalu am y dyn hwn, gan ddarparu blancedi ac offer tra bod y Rhingylliaid Gwirfoddol Cole a Walters yn diweddaru ystafell reoli’r gwasanaeth ambiwlans am y sefyllfa.”

Cyrhaeddodd cerbyd ymateb brys y gwasanaeth ambiwlans a chymryd gofal o’r sefyllfa, ac aed â’r dyn i’r ysbyty am driniaeth bellach.

Bydd yn cael ei drin mewn perthynas â honiad o ddifrod troseddol oherwydd amheuir ei fod wedi malu ffenestr drwy ei phwno.

Dywedodd Cwnstabl Hope: “Rwyf wedi derbyn cryn dipyn o hyfforddiant meddygol gan y fyddin, sydd wedi talu ar ei ganfed y tro hwn.

“Gweithiodd tîm gorsaf heddlu Aberteifi gyda’i gilydd yn dda iawn, gan helpu i reoli sefyllfa gymhleth.”

Ychwanegodd y Rhingyll dros dro Amy Harvey: “Gwelodd y digwyddiad hwn, lle’r oedd llawer o bwysau, waith ardderchog gan bob swyddog a oedd yn gysylltiedig ag ef, yn enwedig Cwnstabl Hope. Heb os, rhwystrodd ei weithredoedd canmoladwy ddirywiad y claf.”