Alcohol yn cael ei atafaelu ac unigolyn ifanc yn ei arddegau’n cael ei arestio wrth i’r heddlu ymdrin ag ymddygiad gwrthgymdeithasol

Atafaelodd yr heddlu symiau mawr o alcohol ac arestio unigolyn ifanc yn ei arddegau wrth iddynt barhau i ymdrin ag ymddygiad gwrthgymdeithasol dros y penwythnos.

Roedd gan Heddlu Dyfed-Powys gynlluniau rhagweithiol mewn grym ar gyfer ymdrin â phroblemau parhaus o ran grwpiau o bobl ifainc yn ymgasglu yn Sir Gaerfyrddin yn dilyn adroddiadau cynyddol am ymddygiad gwrthgymdeithasol sy’n gysylltiedig ag alcohol dros y ddeufis diwethaf.

Roedd gorchmynion gwasgaru mewn grym ar draws Llanelli a Phorth Tywyn, gan roi pwerau i’r heddlu symud unrhyw un y credir ei fod yn achosi niwsans, aflonyddu neu ofid allan o’r ardal.

Sylwodd swyddogion a oedd yn patrolio’r rhwydwaith rheilffyrdd yn Sir Gaerfyrddin ddydd Sadwrn ar lawer iawn o bobl ifainc yn dod oddi ar y trên yng Nglan-y-fferi. Rhoddwyd gorchymyn gwasgaru ychwanegol ar waith ac atafaelwyd alcohol. 

Roedd yn rhaid i swyddogion ymdrin â phlant yn tresmasu ar y cledrau hefyd.

Dywedodd y Rhingyll Gemma Davies: “Yr oeddem wedi derbyn adroddiadau am blant ag alcohol yn rhedeg ar draws y cledrau, a oedd yn cyflwyno perygl mawr iddyn nhw’u hunain ac eraill, ac roedd yn rhaid stopio hyn ar unwaith.

“Dechreuodd un bachgen a gafodd ei ddal ymddwyn yn ymosodol tuag at swyddogion ac nid oedd modd rhesymu ag ef. Doedd dim dewis gan swyddogion ond ei arestio er ei ddiogelwch ei hun ac er mwyn atal troseddau pellach rhag cael eu cyflawni.

“Mae’r digwyddiad hwn yn dangos bod y math o ymddygiad yr ydym yn ymdrin ag ef yn mynd tu hwnt i bobl ifainc yn cwrdd er mwyn cael amser da, a’i fod yn rhoi pobl mewn sefyllfaoedd hynod o beryglus.”

Arestiwyd bachgen 17 oed ar amheuaeth o dresmasu ar y rheilffordd a defnyddio geiriau neu ymddygiad bygythiol, ymosodol neu sarhaus er mwyn achosi aflonyddu, gofid neu fraw.

Mae’r bachgen wedi’i ryddhau dan ymchwiliad tra bod yr Heddlu Trafnidiaeth Prydeinig yn cynnal ymholiadau pellach.

Ymyrrwyd yn gynnar yn ardal Trostre, Llanelli, pan sylwodd swyddogion ar grwpiau o blant yn cwrdd yno ddydd Sadwrn.

Dywedodd y Rhingyll Davies: “Symudwyd mwy na 60 o unigolion ifainc o’r ddau leoliad ac atafaelwyd llawer iawn o alcohol.

“O’r grwpiau hyn, cyhoeddwyd pedwar hysbysiad ar gyfer y rhai a oedd yn achosi’r helynt mwyaf yn ardal Trostre, gan eu hatal rhag dychwelyd, ac aed â phob un o’r unigolion hyn gartref.

“Drwy weithredu’n gyflym, ataliwyd pobl ifainc eraill a oedd yn bwriadu ymuno â’r grwpiau ac a oedd dal yn teithio i’r ardal.” 

“Byddwn yn parhau i roi cynlluniau ar waith bob penwythnos ac yn ystod y gwyliau haf ar gyfer ymdrin ag ymddygiad gwrthgymdeithasol, gan ddefnyddio’r holl bwerau sydd ar gael inni i’w atal.”