Arestiadau’n cael eu gwneud yn ystod ymgyrch er mwyn mynd i’r afael â gyrru gwrthgymdeithasol

Arestiodd yr heddlu ddau unigolyn a stopio ceir a oedd yn goryrru ar gyflymder a oedd dros ddwywaith y terfyn cyfreithiol yn ystod ymgyrch ar gyfer mynd i’r afael â gyrru gwrthgymdeithasol.

Arweiniodd Uned Plismona’r Ffyrdd Sir Gaerfyrddin Heddlu Dyfed-Powys ymgyrch amlasiantaeth rhwng Machynys a Doc y Gogledd nos Wener yn dilyn cynnydd yn nifer yr adroddiadau am yrwyr yn rasio yn yr ardal ac yn ymgasglu yn y maes parcio.  

Cafodd chwech o bobl eu dal yn goryrru mewn dwy awr a hanner. Y cyflymder uchaf oedd 88mya mewn parth 40mya.

Arestiwyd dau unigolyn hefyd – un ar amheuaeth o gymryd cyffuriau a gyrru, ac un a oedd yn eisiau.

Dywedodd y Rhingyll Richard Lucas: "Nod yr ymgyrch oedd rheoli nifer y bobl sy’n gyrru’n wrthgymdeithasol ar hyd ffordd yr arfordir rhwng Machynys a Doc y Gogledd, ac yn Noc y Gogledd ei hun.

"Mae’r ymddygiad hwn wedi dod yn destun pryder ar gyfer pobl sy’n byw yn yr ardal, ac roeddem eisiau cymryd camau gweithredu llym i’w atal.

"Drwy gydol y noson, bu ymgysylltu rhwng swyddogion a phobl sy’n frwd am geir. Canolbwyntiwyd ar beryglon gyrru gwrthgymdeithasol a goryrru.

"Stopiom nifer o geir, cyhoeddom 19 rhybudd, ac atafaelom un cerbyd."

Ymunodd yr Asiantaeth Trwyddedu Gyrwyr a Cherbydau, y DVLA, GanBwyll a Thimoedd Plismona Bro â swyddogion, a chynhaliwyd gwiriadau cyflymder, treth ac yswiriant mewn mannau problemus o ran troseddu.

Er taw’r nod cyffredinol oedd addysgu gyrwyr am beryglon goryrru neu yrru cerbydau nad oeddent yn addas ar gyfer y ffordd, roedd gorfodi hefyd yn ofynnol. Dyma’r canlyniadau:

2 arést - un am gymryd cyffuriau a gyrru ac yn ar gyfer unigolyn a oedd yn eisiau

Cafodd 6 unigolyn eu dal yn goryrru

4 gwaharddiad yn syth ar gyfer cerbydau peryglus neu gerbydau a oedd wedi’u gorlwytho

5 gwaharddiad gohiriedig

Cyhoeddwyd 8 adroddiad trosedd traffig i yrwyr heb yswiriant, gyrwyr heb MOT, pobl a oedd yn goryrru neu bobl a oedd yn defnyddio ffôn tu ôl i’r olwyn

Cyhoeddwyd adroddiad trosedd traffig ar gyfer cerbyd a oedd mewn cyflwr peryglus

Cyhoeddwyd adroddiad trosedd traffig ar gyfer trosedd yswiriant

Atafaelwyd un car

Hon oedd yr ail ymgyrch o’i fath i gael ei chynnal ar hyd yr heol arfordirol yn ystod yr wythnosau diwethaf, a bydd swyddogion yn parhau i fonitro’r sefyllfa.

Dywedodd y Rhingyll Lucas: "Parodd yr ymgyrch tua dwy awr a hanner yn ystod cyfnod prysur yn yr ardal honno, ac roedd hi’n llwyddiannus iawn.

"Yr oedd yn enghraifft ardderchog o waith amlasiantaeth ar gyfer mynd i’r afael â phryderon a godwyd gan y gymuned.

"Yr adeg hon o’r flwyddyn, yn draddodiadol, yr ydym yn gweld cynnydd aruthrol o ran traffig ar ein ffyrdd, ac yn anffodus, mae nifer y gwrthdrawiadau difrifol yr ydym yn mynd iddynt hefyd yn codi. Wrth gwrs, yr ydym eisiau osgoi hyn, felly mae unrhyw lefel o ymgysylltiad ac addysg y medrwn ddarparu’n gadarnhaol.”