Carcharu dyn am gnoi clust swyddog diogelwch mewn “gweithred ddialgar”

Mae dyn wedi’i garcharu am bum mlynedd a hanner am ymosod ar swyddog diogelwch mewn digwyddiad elusennol a adawodd ef wedi’i anffurfio’n barhaol.

Canfu Philip Nicholas Ladd yn euog o achosi niwed corfforol difrifol ar ôl cnoi darn mawr o glust dyn i ffwrdd ym mis Mawrth 2019.  

Galwyd Heddlu Dyfed-Powys i Glwb Pêl Droed Cei Newydd yn dilyn y digwyddiad, a welodd y dyn 38 oed yn ymateb yn dreisgar pan gafodd ei atal rhag mynd mewn i’r clwb gan swyddog diogelwch.

Ar ôl bwrw pen y dioddefydd, cnôdd Ladd ddarn o glust yr aelod staff a phoeri rhan ohoni ar y llawr o’i flaen cyn gadael mewn tacsi.  

Dywed y dioddefydd, a gafodd ei gymryd i’r ysbyty’n syth, bod yr anaf wedi’i adael yn teimlo’n ymwybodol o’r ffordd mae’n edrych.

Mewn datganiad effaith dioddefydd, dywedodd, “Nid ymosodiad yr ydych yn ymwybodol i raddau y gallai ddigwydd wrth weithio fel swyddog diogelwch mewn digwyddiadau oedd hwn. Roedd hwn yn ymosodiad creulon a dialgar sydd wedi arwain at anaf na fydd byth yn gwella’n llwyr, a byddaf yn cael fy atgoffa’n aml am yr hyn ddigwyddodd imi.

“Roedd hi’n anodd iawn imi fynd nôl i’r gwaith, ond rwyf wedi llwyddo i wneud hynny gan fod yn rhaid imi gefnogi fy hun a’m teulu. Y mae dal yn anodd imi oherwydd rwy’n ofni y gallwn ddioddef ymosodiad arall, dim ond am wneud fy ngwaith. 

“Ni ddylwn deimlo fel hyn, a chyn y digwyddiad hwn, doeddwn i ddim yn teimlo fel hyn.”

Gwelodd ymchwiliad i’r digwyddiad swyddogion yn cyfweld â nifer o dystion ac yn asesu darnau ffilm TCC o’r ardal o gwmpas y clwb er mwyn canfod pwy oedd y drwgdybyn.

Arestiwyd Ladd o fewn oriau i’r digwyddiad yn cael ei adrodd, a pharhaodd swyddogion i ymchwilio i’r drosedd – gan archwilio samplau DNA o geg y diffynnydd a chlust y dioddefydd.

Cyhuddwyd Ladd, o Aberaeron, o ymosod gan achosi niwed corfforol difrifol â bwriad ym mis Tachwedd 2019.

Gwadodd y drosedd a chafodd ei ganfod yn euog o ymosod gan achosi niwed corfforol difrifol mewn ail dreial.

Cafodd ei ddedfrydu i bum mlynedd a chwe mis o garchar.

Dywedodd y Ditectif Ringyll Steve Barry, swyddog yr achos, “Roedd y digwyddiad hwn yn arbennig o dreisgar, a welodd y diffynnydd yn ymosod ar swyddog diogelwch a oedd ond yn gwneud ei waith.

“Dywedwyd wrth Ladd na allai fynd yn ôl i mewn. Roedd y ffordd yr ymatebodd i hyn yn gwbl annerbyniol ac mae’r dioddefydd wedi’i adael ag atgoffâd parhaus o’r ymosodiad. 

“Yr ydym yn falch bod gwaith caled swyddogion ymchwilio o ran rhoi’r ffeil dystiolaeth at ei gilydd wedi arwain at euogfarn, ac rwy’n gobeithio bod y ddedfryd hon yn rhoi rhywfaint o gysur i’r dioddefydd.”