Cryfder tystiolaeth yr heddlu’n arwain at fasnachwr cyffuriau mynych yn cyfaddef meddiant â’r bwriad o gyflenwi

Arweiniodd cryfder y dystiolaeth a gasglwyd gan yr heddlu o fewn oriau i ddyn gael ei arestio ar amheuaeth o feddu ar gyffuriau â’r bwriad o gyflenwi ato’n pledio’n euog ac yn derbyn dedfryd o garchar.

Gweithiodd swyddogion Heddlu Dyfed-Powys yn gyflym yn dilyn arestio Sanjit Sanghera, o Lanelli, gan lunio ffeil o dystiolaeth yn profi bod y diffynnydd wedi bod yn rhan o gyflenwi sylweddau anghyfreithlon yn Sir Gaerfyrddin ers 2018.

Chwiliodd swyddogion drwy ffôn yr unigolyn 21 oed wedi i ganabis a chocên â gwerth posibl o hyd at £10,000 ar y stryd gael ei ganfod yn ystod gwarant yn ei gartref yn Heol yr Ysgol, Morfa.

Dywedodd y Ditectif Ringyll Andrew Clatworthy: “Datgelodd ymholiadau digidol trylwyr llu o negeseuon lle'r oedd negeseuwyr yn gofyn am argaeledd a phrisiau sylweddau penodol.

“Pan gawsant eu hargraffu, roedd 32 tudalen o negeseuon, a’r cyfan yn awgrymu bod defnyddiwr y ffôn yn rhan o gyflenwi cocên a chanabis o Fedi 2018 hyd at Fai 2021, gyda negeseuon mor ddiweddar â’r diwrnod cyn y cyflawnwyd y warant.

“Rhoddodd y negeseuon hyn dystiolaeth glir i ni fod Sanghera wedi bod yn fasnachwr cyffuriau mynych yn yr ardal am nifer o flynyddoedd. Ynghyd â swm y sylweddau a atafaelwyd o’i gartref, fe wnaethant arwain at gyfaddefiad di-oed gan y diffynnydd.”

Cyflawnodd swyddogion gyrch ar gartref Sanghera ar ddydd Mercher, Mai 19 fel rhan o ymchwiliad i gyflenwad cyffuriau ehangach yn Sir Gaerfyrddin.

Cafwyd hyd i fagiau’n cynnwys canabis a chocên yn sied yr ardd, lle sefydlwyd bod y diffynnydd wedi bod yn rhedeg ei fusnes cyflenwi.

Cafwyd hyd i sylweddau pellach wedi eu cuddio mewn jariau bisgedi yng nghypyrddau’r gegin.

Meddai’r Ditectif Ringyll Clatworthy: “Arweiniodd chwiliad llawn o’r tŷ at atafaelu £4000 mewn arian parod, ynghyd â dros hanner cilogram o ganabis a thua 41 gram o gocên.

“Mae hyn yn fwy o lawer na beth y byddem yn disgwyl dod o hyd iddo ar gyfer defnydd personol rhywun.”

Cafodd y sylweddau eu profi o fewn oriau i’r warant, ac roeddynt i gyd yn bositif am ganabis a chocên.

Cyhuddwyd Sanghera o feddu ar gyffuriau dosbarth A gyda’r bwriad o werthu, meddu ar gyffuriau dosbarth B gyda’r bwriad o werthu, a chael, defnyddio neu feddu ar eiddo troseddol - sef £4,227.

Cyfaddefodd i’r holl droseddau pan ymddangosodd gerbron Llys Ynadon Llanelli y diwrnod canlynol, a dedfydwyd ef i 26 mis yn y carchar yn Llys y Goron Abertawe ar ddydd Gwener, Mehefin 5.

Dywedodd y Ditectif Ringyll Clatworthy: “Arweiniodd gwaith rhagorol gan nifer o adrannau at ble euog cynnar iawn gyda diolch i gryfder y dystiolaeth a gasglwyd tra roedd Sanghera yn y ddalfa.

 “Hoffwn ddiolch i’r holl swyddogion a oedd yn rhan o hyn am eu hymdrechion, ac am eu cyfraniad i aflonyddu ar giang troseddu trefnedig sy’n gweithredu yn ardal Sir Gaerfyrddin.”