Masnachwyr cocên yn cyfaddef cynllwyn i gyflenwi

Mae naw person wedi cyfaddef cynllwyn i gyflenwi cyffuriau dosbarth A fel rhan o gang oedd yn masnachu cocên yn Sir Gaerfyrddin.

Mae Tîm Troseddau Difrifol a Threfnedig Heddlu Dyfed-Powys wedi datgymalu gang troseddu cyfundrefnol oedd yn cludo cyffur dosbarth A rhwng Abertawe a Phontarddulais i Lanelli fel rhan o ymchwiliad cudd o’r enw Ymgyrch Elegant.

Cynhaliodd y tîm gyfres o 19 warant wedi’u cynllunio ymlaen llaw mewn cartrefi ledled Llanelli ym mis Hydref 2020 ar ôl derbyn gwybodaeth bod y deiliaid yn ymwneud â chyflenwi cocên.

Roedd swyddogion eisoes wedi chwilio cyfeiriad West End Neville Ayres yn dilyn ‘stopio a gwirio’ y mis blaenorol, pan atafaelwyd 225g o gocên gyda gwerth stryd o fwy na £22,700 o’i gar.

Arweiniodd y gwarantau at arestio 13 o bobl dan amheuaeth o fod yn rhan o gynllwyn i gyflenwi cocên i Lanelli rhwng mis Mai a mis Hydref 2020.

Cyhuddwyd naw o bobl a gwnaethon nhw gyfaddef y drosedd yn Llys y Goron Abertawe.

Dywedodd y Ditectif Gwnstabl, Mark Jones, a arweiniodd yr ymgyrch: “Roedd hon yn ymgyrch sylweddol i’r heddlu, ac i adran Sir Gaerfyrddin yn benodol, gyda swyddogion o nifer o adrannau’n ymwneud â chynllunio a gweithredu’r gwarantau, archwilio’r eitemau a atafaelwyd, cyfweld â phob un o’r 13 unigolyn dan amheuaeth, a llunio ffeil gref o dystiolaeth ar gyfer Gwasanaeth Erlyn y Goron.

“Diolch i waith caled pawb a gymerodd ran, daethpwyd â chyhuddiadau o gynllwynio i gyflenwi cyffuriau dosbarth A yn erbyn y naw diffynnydd – ac mae pob un ohonynt wedi cyfaddef y drosedd.

“Does dim dwywaith bod ymwneud cymaint â hyn o bobl â chyflenwi cyffuriau mewn un ardal yn gysylltiedig â gang troseddu cyfundrefnol sy’n gweithredu ar raddfa fwy, a bydd ein gwaith wedi amharu’n ddifrifol ar y gadwyn gyflenwi hon i’r sir.

“Hoffwn ddiolch i’r tîm ymchwilio am eu hymroddiad, a hoffwn hefyd roi sicrwydd i’r bobl sy’n byw yn Llanelli y byddwn yn parhau i weithredu ar eu pryderon ynghylch cyflenwi cyffuriau, a’r defnydd ohonynt, yn yr ardal.”

Mae disgwyl i’r diffynyddion canlynol gael eu dedfrydu yn Llys y Goron Abertawe fis nesaf:

• Laura Coelho, 28, o Bond Avenue, Llanelli
• Neville Ayres, 42, o West End, Llanelli
• Rebecca Viola, 36, o Gae Glas, Llanelli
• Jordan Dale Parry, 25, o Stryd Dilwyn, Llanelli
• Keiran Price, 28, o Dirgof, Llangennech
• Jeffrey Parker-Ward, 23, o Stryd Stepney, Llanelli
• Daniel Rhodri Evans, 29, o Heol Elfed, Llanelli
• Shaun Hearne, 27, o Isgraig, Porth Tywyn
• Aaron Hookway, 25, o Heol yr Orsaf, Fforestfach

I roi gwybod am ymddygiad amheus yn eich cymuned, ewch i https://bit.ly/DPPContactOnline, e-bostiwch [email protected], neu ffoniwch 101.

Os ydych chi’n fyddar, yn drwm eich clyw, neu â nam ar eich lleferydd, anfonwch neges destun at y rhif nad yw ar gyfer argyfwng ar 07811 311 908.

Fel arall, cysylltwch yn ddienw â’r elusen annibynnol, Crimestoppers, ar 0800 555111, neu ewch i crimestoppers-uk.org.