Ymddygiad gwrthgymdeithasol gan grŵp o tua 100 o unigolion ifainc ar Mai 28, yng ngorsaf dren Porth Tywyn a Llanelli

Ymatebodd yr heddlu i adroddiadau am ymddygiad gwrthgymdeithasol yr oedd grŵp o tua 100 o unigolion ifainc yn gysylltiedig ag ef nos Wener 28 Mai yng ngorsaf drenau Porth Tywyn. Aeth swyddogion o’r Heddlu Trafnidiaeth Prydeinig i’r lleoliad ynghyd â SCCH Dyfed-Powys, ond gwaethygodd y sefyllfa ar ôl i’r bobl ifainc (y rhan fwyaf ohonynt wedi meddwi) ddechrau ymddwyn yn ymosodol ac afreolus. Rhannodd y grŵp yn grwpiau llai, ac aeth nifer ohonynt ar y trên i Lanelli.

Dywedodd yr Arolygydd Dawn Fencott-Price: “Aeth dau ringyll ar y trên hefyd er mwyn ceisio atal ymddygiad gwrthgymdeithasol pellach a rhoi tawelwch meddwl i deithwyr eraill a gyrrwr y trên. Yr oeddent mewn cerbyd gyda 30-40 o’r unigolion ifainc, ac yn ystod y daith, bu ymladd rhwng aelodau’r grŵp. Ceisiodd y ddau ringyll eu gwahanu, ac arestio’r drwgdybiedigion. Wynebasant ymddygiad ymosodol a rhwystr, ond yn y diwedd, llwyddodd y swyddogion i wahanu’r troseddwyr rhag gweddill y grŵp. Fodd bynnag, wrth wneud hynny, ymosododd un o’r drwgdybiedigion ar y ddau ohonynt.

“Arestiwyd nifer am ymosod ac am ymosod ar yr heddlu. Yna, fe wnaeth yr anrhefn barhau ar blatfform gorsaf drenau Llanelli, a chafodd rhagor eu harestio am fod yn feddw ac afreolus ac am droseddau trefn gyhoeddus.

“Parhaodd yr ymddygiad ymosodol yn erbyn swyddogion, a gwrthododd sawl un adael er bod rhai wedi derbyn hysbysiad gwasgaru a chyfarwyddyd i adael. Gan hynny, roedd yn rhaid i swyddogion ddefnyddio grym i’w symud o’r platfform i’r stryd.

“Fe gymerodd amser ac adnoddau sylweddol i wasgaru’r bobl ifainc a dod â'r digwyddiad hwn i derfyn diogel, a hynny ar adeg pan fod yna alw mawr am ein hadnoddau beth bynnag. Nid oes esgus dros y lefel hon o anhrefn, ac yn ddealladwy, mae’n achosi pryder a gofid i’r gymuned a phreswylwyr.”

Aed â’r unigolion a arestiwyd adref at eu rhieni. Byddant yn cael eu trin yn ddiweddarach gan yr Heddlu Trafnidiaeth Prydeinig, a fydd yn arwain yr ymchwiliad.

Ychwanegodd yr Arolygydd Dawn Fencott-Price: “Byddem yn apelio’n uniongyrchol i rieni fod yn ymwybodol o leoliad eu plant a’r hyn maen nhw’n ei wneud. Ni ddioddefir ymddygiad gwrthgymdeithasol o’r fath, ac anogwn rieni i fod yn atebol am weithredoedd eu plant.

“Yr ydym wedi derbyn galwadau gan breswylwyr ym Mhorth Tywyn sy’n poeni am ymddygiad grwpiau mawr o bobl ifainc yn y dref ers cryn amser, ac fe’u hanogwn i barhau i ddweud wrthym am ymddygiad o’r fath. Cymerwyd camau rhagweithiol ar gyfer mynd i’r afael â hyn. Yr ydym wedi rhoi adnoddau ychwanegol ar waith er mwyn caniatáu i swyddogion ymateb yn gyflym, ac rydym yn parhau i wneud hynny.”  

Dywedodd Cwnstabl Rhys Lewis o’r Heddlu Trafnidiaeth Prydeinig: “Mae ein swyddogion, a rhwydwaith o gamerâu TCC, yn monitro’r rheilffordd 24/7.

“Ein prif flaenoriaeth yw cadw teithwyr a swyddogion rheilffordd yn ddiogel, ac ni ddioddefir ymddygiad gwrthgymdeithasol. Bydd swyddogion gennym yn cynnal patrolau amlwg yn y lleoliadau hyn dros y penwythnos, ac rydym yn gweithio’n agos â’n partneriaid yn Heddlu Dyfed-Powys a Thrafnidiaeth Cymru er mwyn sicrhau bod y rhai sy’n teithio’n medru gwneud hynny’n ddiogel.

“Gall unrhyw un sy’n profi problemau wrth deithio anfon neges destun atom ar 61016 neu’n galw ar 0800 40 50 40.”

Mae Tîm Plismona Bro Llanelli’n cynnal patrolau amlwg yn yr ardal, gyda chymorth swyddogion ymateb, gan batrolio ardaloedd sy’n boblogaidd ymysg pobl ifainc. Yr ydym hefyd yn cydweithio’n agos â’n partneriaid, megis yr Heddlu Trafnidiaeth Prydeinig, Cyngor Sir Gaerfyrddin a Gwasanaeth Tân ac Achub Canolbarth a Gorllewin Cymru, ac ni fyddwn yn oedi i wasgaru grwpiau.