Carcharu dyn am ymosodiad treisgar ar swyddog heddlu

Mae dyn a ymosododd yn ffyrnig ar swyddog heddlu wedi’i garcharu dau ddiwrnod yn unig ar ôl y digwyddiad.

Ymosododd Connaire Parsons o Ystradgynlais ar un o drinwyr cŵn Heddlu Dyfed-Powys mewn lôn yn Ystradgynlais tra bod y swyddog yn ceisio ei arestio am drosedd arall.

Roedd y swyddog wedi ymateb i alwad tua 9.30 o’r gloch nos Sul 28 Mawrth yn adrodd am grŵp o ddynion yn cicio drws ffrynt y galwr ac yn gwneud bygythiadau.

Daethpwyd o hyd i un o’r drwgdybiedigion yn gyflym, ac fe gafodd ei arestio ar amheuaeth o ddefnyddio trais er mwyn cael mynediad i eiddo, meddu ar gyffuriau dosbarth A, aflonyddu, a bygwth cyflawni difrod troseddol.

Aed ag ef i’r ddalfa ac fe gafodd ei ryddhau ar fechnïaeth. Daeth triniwr cŵn o hyd i ddrwgdybyn arall – Parsons, sy’n 23 oed – yn fuan wedi hynny mewn lôn ger yr afon.

Cafodd ei arestio, ac fe ymosododd yn gorfforol ar y cwnstabl heddlu. Pwnodd ef yn ei wyneb sawl gwaith, gan ei daflu i’r llawr a cheisio ei gnoi.

Dywedodd y Ditectif Ringyll Christine Beaton: “Ymosodiad digymell oedd hwn gan droseddwr mynych a threisgar ar swyddog a oedd yn ceisio gwneud ei waith.

“Dioddefodd y swyddog boen sylweddol i’w wyneb a’i ên, ac anafodd ei ysgwydd a’i lun. Mae’n ffodus nad oedd yr anafiadau a ddioddefodd yn fwy difrifol, ond nid yw hynny’n bychanu’r trais ofnadwy a ddioddefodd.”

Aeth swyddogion ychwanegol a oedd gerllaw i leoliad y digwyddiad er mwyn cynorthwyo’r cwnstabl heddlu, a arhosodd ar ddyletswydd ond a aeth i’r ysbyty i gael ei anafiadau wedi’u hasesu.

Cafodd Parsons ei ffrwyno ac aed ag ef i ddalfa’r heddlu, lle y’i cyhuddwyd o ymosod drwy guro gweithiwr brys.

Ymddangosodd yn Llys y Goron Merthyr Tudful ddydd Mawrth 30 Mawrth, lle y plediodd yn euog i’r drosedd. Fe’i dedfrydwyd i 6 mis o garchar.

“Roedd Parsons wedi’i ryddhau o’r carchar yn 2020 yn dilyn euogfarn am gymryd cerbyd gwaethygedig a gyrru peryglus, ac nid oedd wedi’i weld yn yr ardal yn ddiweddar,” meddai’r Ditectif Ringyll Beaton.

“Ni ddylai’r un gweithiwr brys wynebu trais fel hyn ar ddyletswydd, ac rydym yn gobeithio bod y canlyniad yn anfon neges i’r diffynnydd na fydd ei ymddygiad gwrthgymdeithasol a throseddol yn cael ei oddef.

“Diolchaf i bob swyddog a oedd yn gysylltiedig â’r ymchwiliad ac a gyfrannodd at gael canlyniad cyflym ar gyfer y drosedd ddifrifol hon, a hefyd i’r swyddog a ddioddefodd yr ymosodiad am ei ymrwymiad i’r gwasanaeth drwy aros ar ddyletswydd.”