Carcharu dyn o Gaerfyrddin ar ôl rhyng-gipio llwythi o gyffuriau yn y post

Mae dyn o Gaerfyrddin wedi’i garcharu ar ôl i’w lwyth o ecstasi a crystal meth gael ei ryng-gipio yn y post.

Lansiodd Heddlu Dyfed-Powys ymchwiliad manwl ar ôl i barsel a oedd wedi’i fwriadu ar gyfer cartref Aaron Barry ar Heol Undeb gael ei ryng-gipio wrth iddo gyrraedd y DU.

Canfu bod y parsel yn cynnwys swm mawr o MDMA. 11 diwrnod yn ddiweddarach, rhyng-gipiwyd ail barsel a oedd wedi’i anfon at y dyn 30 oed. Y tro hwn, yr oedd yn cynnwys 104g o’r cyffur crystal meth.

Dywedodd swyddog yr achos, Cwnstabl Jamie Pike: “Aeth swyddogion i’r cyfeiriad ar y parseli, gan adnabod y deiliad, Aaron Barry. Cafodd ei arestio’n syth ar amheuaeth o fewnforio cyffuriau a reolir.

“Awdurdodwyd chwiliad o’i gartref, lle yr atafaelwyd swm mawr o ganabis ac MDMA. Daethpwyd o hyd i’r sylweddau hyn mewn lleoliadau amrywiol o gwmpas y fflat. Roedd rhai cyffuriau wedi’u cuddio mewn blychau a thuniau bisgedi.

“Dadansoddwyd y cyffuriau gan swyddog arbenigol, a chanfu bod cyfanswm eu gwerth ar y stryd dros £13,500.”

Aed â ffonau symudol a chyfrifiaduron o dŷ Barry hefyd, ac fe’u harchwiliwyd am dystiolaeth o gyffuriau’n cael eu hallforio.

Drwy ymholiadau digidol dyfal, sefydlodd Tîm Troseddau Economaidd yr heddlu bod Barry’n cynnal ei fusnes drwy gyfrif banc ei gariad heb yn wybod iddi.

“Canfu bod dros £20,000 wedi mynd drwy ei chyfrif banc yn ystod 2018,” meddai Cwnstabl Pike.

“Roedd Barry hefyd wedi prynu llawer iawn o gryptoarian ac wedi sefydlu cyfrif ISA yn enw ei gariad er mwyn cuddio peth o’r arian.”

Er ei fod wedi gwrthod gwneud sylw wrth gael ei gyfweld, cyfaddefodd y dyn 30 oed i gyhuddiadau o fewnforio cyffuriau dosbarth A, meddu ar gyffuriau dosbarth A a B â’r bwriad o werthu, a gwyngalchu arian yn ddiweddarach.

Ymddangosodd yn Llys y Goron Abertawe ddydd Iau 18 Mawrth, lle y’i dedfrydwyd i gyfanswm o 40 mis o garchar.

“Roedd hwn yn ymchwiliad hir a manwl a ymestynnodd dros 18 mis ac a oedd yn cynnwys cyflwyniadau gwerthfawr gan nifer o adrannau ac asiantaethau,” meddai Cwnstabl Pike.

“Diolch i waith swyddogion ymroddedig a’r Tîm Troseddau Economaidd, llwyddom i roi achos cryf o dystiolaeth at ei gilydd, a arweiniodd at ddedfryd sylweddol o garchar.

“Rwy’n gobeithio bod hyn yn dangos ein bod ni wedi ymrwymo i aflonyddu ar gyflenwad cyffuriau yn ein cymunedau, ac y byddwn yn gwneud pob dim o fewn ein gallu i ddwyn y rhai sy’n gysylltiedig â chyffuriau i gyfiawnder.”