Yr Heddlu’n annog y cyhoedd i beidio â dadwneud gwaith caled drwy ymweld ag ardaloedd hardd
Cynnwys y prif erthygl
Mae Heddlu Dyfed-Powys yn annog pobl i beidio â pheryglu dadwneud eu holl waith caled drwy dorri rheoliadau coronafeirws wrth i’r tywydd wella.
Wrth i’r tywydd braf ein cyrraedd a’r dyddiau ymestyn, ac wrth i gyfraddau heintio ddisgyn, mae’n hawdd deall bod cymunedau’n teimlo’n fwy cadarnhaol.
Fodd bynnag, rydyn ni’n parhau i fod dan gyfyngiadau symud Lefel 4 a gallai torri rheoliadau Llywodraeth Cymru nawr beryglu unrhyw gynlluniau i godi’r cyfyngiadau symud yn y dyfodol agos.
Meddai’r Uwcharolygydd Andrew Edwards: “Rydyn ni’n gwybod pa mor anodd mae hyn wedi bod, rydyn ni wedi byw drwy’r pandemig hwn gyda chi, felly rydyn ni’n deall pam mae pobl yn awyddus i ddychwelyd i ryw fath o normalrwydd mor fuan â phosibl.
“Fodd bynnag, os yw’r gyfradd heintio’n stopio disgyn, neu hyd yn oed yn dechrau cynyddu, mae perygl y byddwn ni’n achosi cyfyngiadau pellach.
“Fe welsom ni gynnydd mewn pobl yn teithio i fannau hardd y penwythnos diwethaf, sydd wir yn achos pryder.
“Y mae hefyd yn annheg ar bobl sy’n byw o fewn y cymunedau hynny a fydd efallai’n teimlo nad ydynt yn gallu mynd allan gan fod pobl yn teithio i’r ardal, a’u bod yn ofni cael eu rhoi mewn perygl oherwydd teithio anghyfreithlon.”
Mae’r rheoliadau’n nodi bod yn rhaid i ni beidio â theithio ar gyfer ymarfer corff.
Gellir dod o hyd i ganllawiau Coronafeirws Llywodraeth Cymru yma: https://llyw.cymru/coronafeirws