Cyngor yr Heddlu yn dilyn adroddiadau am ddyn yn dynwared swyddog heddlu lleol.

Mae Heddlu Dyfed-Powys yn ymchwilio i nifer o adroddiadau yn ardaloedd Powys a Cheredigion am ddyn yn dynwared swyddog heddlu lleol.

Mae’r dyn hwn yn cysylltu â busnesau lleol ac yn holi cwestiynau am deledu cylch cyfyng neu’n dweud ei fod eisiau trafod digwyddiad diweddar. Weithiau, dywedodd mai Cwnstabl Jackson oedd ei enw.

Mae’r heddlu’n gofyn i’r cyhoedd fod yn wyliadwrus, riportio am unrhyw alwadau amheus, a dilyn y cyngor isod.

• Gofynnwch am fanylion y sawl sy’n galw, gan gynnwys enw, rheng, rhif coler a gorsaf.

• Gofynnwch pa heddlu y mae’n gweithio iddo.

• Nodwch unrhyw fanylion cyswllt sy’n ymddangos ynghylch y galwr neu drwy 1471 ar ôl i’r alwad ddod i ben.

• Dewch â’r alwad i ben. Dywedwch y byddwch yn cysylltu â’r heddlu’n uniongyrchol er mwyn cadarnhau pwy ydyw a chael eich trosglwyddo’n fewnol.

• Galwch aelod o’r teulu yn gyntaf er mwyn sicrhau bod y llinell wedi datgysylltu o’r galwr cychwynnol.

• Os bydd unrhyw un yn galw yn eich cyfeiriad ar ôl eich galw, galwch 999.

• Peidiwch â darparu unrhyw fanylion diogelwch dros y ffôn.

Gofynnir i unrhyw un sy’n derbyn galwad tebyg i gysylltu â Heddlu Dyfed-Powys ar-lein ar https://www.dyfed-powys.police.uk/cy-GB/cysylltu-a-ni/af/cysylltu-a-ni/, drwy anfon e-bost at [email protected], neu drwy alw 101.

Dylai unrhyw un sy’n credu ei fod wedi dioddef twyll riportio amdano drwy alw 101, neu drwy alw Action Fraud ar 0300 123 2040.

Am ragor o gyngor a gwybodaeth ynglŷn â sut i osgoi cael eich twyllo, galwch heibio i www.actionfraud.police.uk.