Heddlu'n apelio yn dilyn ymosodiad rhywiol ar lwybr beicio yn Sir Benfro

Mae Heddlu Dyfed-Powys yn apelio am dystion wedi i fenyw ddioddef ymosodiad rhywiol o gwmpas 4.30pm ddydd Sul 16 Mai 2021.

Roedd y fenyw yn cerdded ar hyd y llwybr beicio rhwng Hwlffordd a Tiers Cross pan ddaeth dyn ati gan ei bygwth ac ymosod arni, cyn cerdded i ffwrdd tuag at dref Hwlffordd.

Disgrifir yr unigolyn fel dyn gwyn, rhwng 5 troedfedd 4 modfedd a 5 troedfedd 11 modfedd o daldra, â chorffolaeth arferol gydag acen Gymreig. Mae ganddo wallt tywyll byr, barf a mwstash, llygaid brown, ac roedd yn gwisgo jîns glas golau, crys glas tywyll gyda llewys llwyd.

Gofynnir i unrhyw un a welodd ddyn yn cyfateb i'r disgrifiad hwn yn yr ardal rhwng 3.30pm a 5pm brynhawn Sul 16 Mai gysylltu â'r heddlu.

Mae dyn 35 oed wedi cael ei arestio ac mae yn nalfa'r heddlu ar hyn o bryd.

Mae'r llwybr beicio ar gau ar hyn o bryd tra bod yr ymchwiliad yn parhau.

Dywedodd y Ditectif Uwch-arolygydd Jayne Butler, sy'n arwain yr ymchwiliad,

"Mae digwyddiadau o'r math hwn yn eithriadol o brin yn ardal Dyfed-Powys.

"Efallai y bydd y cyhoedd yn gweld mwy o swyddogion yr heddlu yn y dyddiau nesaf wrth i'r heddlu ymchwilio i'r digwyddiad.

"Gall unrhyw un sydd â phryderon neu wybodaeth a allai helpu ein hymholiadau siarad â'r swyddogion hynny neu gysylltu â'r heddlu.

"Er i ddyn gael ei arestio'n gyflym rydym yn dal i fod yn awyddus i siarad ag unrhyw un a welodd ddyn yn cyfateb i'r disgrifiad uchod yn yr ardal brynhawn ddoe."

Gofynnir i unrhyw un sydd â gwybodaeth a allai helpu'r ymchwiliad gysylltu â'r heddlu. Gellir gwneud hyn

ar-lein yn https://www.dyfed-powys.police.uk/cy-GB/cysylltu-a-ni/af/cysylltu-a-ni/,

drwy e-bostio [email protected],

neu drwy ffonio 101.

Os ydych chi'n fyddar, yn drwm eich clyw neu â nam ar eich lleferydd, anfonwch neges destun at y rhif nad yw ar gyfer argyfyngau, sef 07811 311 908.