Carchar i leidr a adawodd weithiwr siop a oedd ar ei ben ei hun yn crynu mewn ofn

Mae 'troseddwr peryglus a mynych' a ddychrynodd weithiwr a oedd ar ei ben ei hun gyda bygythiadau o drais yn ystod lladrad wedi'i garcharu am dros dair blynedd.

Ceisiodd Ricky Lee Rossi, o Garnswllt, ymosod ar dderbynnydd arian yng ngorsaf betrol Londis yn Rhydaman, cyn dianc â dwy botel o wisgi.

Fe arestiodd Heddlu Dyfed-Powys ddyn 26 oed dan amheuaeth yn ei gartref dim ond awr ar ôl iddynt gael eu hysbysu am y drosedd ar 11 Rhagfyr 2020.

Dywedodd y Ditectif Ringyll Rebecca Thomas: "Roedd hwn yn ddigwyddiad achosodd fraw mawr i'r dioddefwr, a oedd yn cyflawni ei ddyletswydd pan wynebodd fygythiadau o drais gan rywun yr oedd yn ei herio am ddwyn o'r siop.

"Roedd Rossi wedi cael ei weld yn rhoi dwy botel o wisgi i lawr ei drowsus, ac wedi ymateb yn ffyrnig pan ddaeth y dioddefwr ato. Cipiodd y ffôn yr oedd y dioddefwr yn ceisio'i defnyddio i alw am help, a gwnaeth ymdrechion i'w daro a'i gicio.

"Yn ffodus, ni chafodd gweithiwr y siop ei anafu'n gorfforol yn ystod y digwyddiad, ond dioddefodd effeithiau parhaus yn sgil yr ofn a gafodd."

Disgrifiodd y dioddefwr deimlo'n anesmwyth ac yn bryderus yn dilyn y digwyddiad.

Mewn datganiad dywedodd: "Roeddwn i'n ysgwyd ac yn crynu am tua dau neu dri diwrnod oherwydd yr hyn ddigwyddodd. Am y ddau neu dri diwrnod hynny roedd yr hyn a ddigwyddodd yn rhedeg drwy fy meddwl.

"Ers i hyn ddigwydd os oes unrhyw un yn dod i mewn i'r siop sydd â'r un siâp corff â'r dyn a ymosododd arna i, rwy'n mynd yn nerfus yn syth. Rwy'n dechrau edrych arnyn nhw i weld ai’r un unigolyn sydd wedi dod yn ôl."

Cynhaliwyd ymholiadau teledu cylch cyfyng yn gyflym, gyda lluniau'n dangos yr un dan amheuaeth – a adnabyddwyd fel Rossi – yn gadael yr orsaf betrol mewn tacsi. Fe'i lleolwyd yn ei gartref ac fe'i harestiwyd ar amheuaeth o ladrad.

Cafodd ei gyhuddo o ddwyn o siop a lladrad – gan bledio'n euog i'r drosedd gyntaf a chael ei ganfod yn euog o'r ail yn Llys y Goron Abertawe.

Cafodd ei ddedfrydu i 46 mis yn y carchar a chafodd orchymyn atal pum mlynedd.