Dau wedi'u cyhuddo ar ôl atafaeliad heroin mwyaf yr heddlu

Mae dau ddyn wedi’u cyhuddo o droseddau cyflenwi cyffuriau dosbarth A yn dilyn atafaeliad heroin mwyaf erioed Heddlu Dyfed-Powys.

Ar ôl i swyddogion yn Aberystwyth stopio a chwilio unigolion, darganfuwyd tua 1kg o heroin, gwerth tua £125,000, ddydd Gwener, 14 Mai.

Cynhaliwyd y chwiliad ger y castell, ac roedd gan y cyffuriau a atafaelwyd y potensial i gynhyrchu 12,500 o drafodiadau unigol ar y stryd.

Cafodd dau ddyn eu harestio ar unwaith ar amheuaeth o gyflenwi’r cyffuriau.

Dywedodd swyddog yr achos, y Ditectif Ringyll Steve Jones: "Roedd hyn yn atafaeliad sylweddol o gyffuriau dosbarth A a oedd yn mynd i gael eu gwerthu ar strydoedd Aberystwyth a Cheredigion yn ehangach.

"Ar hyn o bryd, credwn mai dyma'r atafaeliad heroin mwyaf erioed yr heddlu.

"Cyflymwyd camau’r ymholiadau’n gyflym iawn i brofi'r sylwedd yn fforensig a chynnal ymchwiliadau digidol, gyda nifer o swyddogion o wahanol dimau yn cydweithio i sicrhau cyhuddiadau yn erbyn dau ddyn."

Cafodd Michael James Price, 48 oed, o Heol y De yn Aberystwyth, ei gyhuddo o feddu ar heroin gyda'r bwriad o gyflenwi.

Cafodd John James Rooney, 44 oed, ei gyhuddo o gyflenwi heroin, caffael, defnyddio neu feddiannu eiddo troseddol – sef £2,325 mewn arian parod, gyrru tra roedd wedi’i anghymhwyso a gyrru heb yswiriant.

Bydd y ddau yn aros yn nalfa'r heddlu hyd nes y gallant ymddangos yn llys yr ynadon.