Diwrnod 7 crynodeb Gwobrau Blynyddol Heddlu Dyfed-Powys: Materion teuluol
Cynnwys y prif erthygl
Ar ddiwrnod olaf ond un o grynodeb Gwobrau Blynyddol Heddlu Dyfed-Powys, rydym yn dathlu beichiogrwydd, magu plant a bywyd teuluol aelodau’r heddlu wrth i ni ddal i fyny ag enillwyr gwobr Amrywiaeth ar Waith 2020 - tîm y Prosiect Rhianta.
Mae tîm y Prosiect Rhianta, sy'n cynnwys Miranda Bryant, Sarah Howells, Karen Caulfield, y Prif Arolygydd Louise Harries a'r Prif Arolygydd newydd Christin Fraser, yn gyfrifol am lywio newid sefydliadol sydd wedi gwella'r gefnogaeth i weithwyr Heddlu Dyfed-Powys sy'n dechrau ar deithiau rhianta.
Dechreuodd tîm y Prosiect Rhianta drwy fwndelu popeth sy'n gysylltiedig â gofal plant gyda'i gilydd a chreu'r 'Hwb Rhianta' newydd, sef siop un stop ar fewnrwyd Heddlu Dyfed-Powys sy'n rhoi cyngor ac arweiniad i staff a'u rheolwyr.
Cyflwynodd y tîm becyn cymorth hefyd i annog gwell cynllunio a chyfathrebu rhwng rheolwyr a darpar rieni.
Dywedodd Sarah Howells, swyddog Adnoddau Dynol: "Mae'n bwysig bod staff yn teimlo’u bod yn cael eu cefnogi ar bob cam o'u taith rianta.
"Gall aelodau staff sy'n mynd ar gyfnodau o absenoldeb mamolaeth, mabwysiadu neu absenoldeb rhiant a rennir fod yn teimlo'n bryderus am eu hamser i ffwrdd o'r gweithle. Er ei fod yn gyfnod cyffrous gall hefyd fod yn frawychus."
Datblygodd y tîm gyfleoedd cymorth cymheiriad i gymheiriad, gyda Hyrwyddwyr Rhianta newydd Heddlu Dyfed-Powys yn cael eu cyflwyno ar draws yr heddlu i ddarparu canllawiau, gwasanaeth cyfeirio a chymorth sylfaenol i weithwyr eraill yn y sefydliad.
Cafodd y Prosiect Rhianta, sy'n dathlu amrywiaeth ac yn hyrwyddo cynwysoldeb yn y gweithle, ei gydnabod fel 'arfer gorau' yn Adroddiad Blynyddol Cydraddoldeb Rhywedd ar gyfer Plismona 2019, gyda heddluoedd eraill ledled y DU yn rhoi arferion newydd Heddlu Dyfed-Powys ar waith.
Canmolodd yr Uwch-arolygydd Ross Evans y grŵp, gan ddweud: "Gweithiodd tîm y Prosiect Rhianta i fynd i’r afael ag achos yr oeddent yn teimlo'n gryf yn ei gylch, gan gymryd camau beiddgar i sicrhau bod cydweithwyr yn cael cefnogaeth well fyth yn y dyfodol."
Roedd tîm y Prosiect Rhianta wrth eu bodd yn derbyn y wobr Amrywiaeth ar Waith ac maent yn parhau i hyrwyddo cynwysoldeb, cynhyrchiant, creadigrwydd a llesiant o fewn teulu plismona'r heddlu.
GWOBR AMRYWIAETH AR WAITH, WEDI’I NODDI GAN | Ffederasiwn yr Heddlu - un o gymdeithasau staff mwyaf y DU sy'n cynrychioli cwnstabliaid, rhingylliaid ac arolygwyr yr heddlu (gan gynnwys prif arolygwyr) ers 1919.