Heddlu Dyfed-Powys Gwobr Dewrder 2020

Wrth i’r diwydiant digwyddiadau ddechrau ailagor, yr ydym yn adlewyrchu ar Wobrau Blynyddol Heddlu Dyfed-Powys y llynedd.

Heno, mae Gwobrau BRIT yn talu teyrnged i’r rhai sydd wedi chwarae rôl allweddol yn y pandemig wrth iddynt groesawu cynulleidfa o 4000 o weithwyr allweddol mewn cynllun peilot sy’n asesu agoriad digwyddiadau mawr yn y DU!

Er nad ydym wedi llwyddo i fynd i ddigwyddiadau a chynulliadau mawr ers dros flwyddyn bellach, mae’r newyddion hwn yn rhoi gobaith bod amserau gwell, mwy cymdeithasol o’n blaenau.

Felly, er mwyn parhau â’r dathliadau, yr ydym yn edrych nôl ar Wobrau Blynyddol 2020 Heddlu Dyfed-Powys, a gynhaliwyd dros sawl cyflwyniad rhithwir, a dros yr ychydig ddyddiau nesaf, byddwn yn rhannu detholiad o straeon llwyddiant ac yn dathlu’r buddugwyr.

Yr ydym yn dechrau drwy adlewyrchu ar ddau swyddog heddlu o Aberystwyth a dderbyniodd wobr Dewrder 2020 ar ôl i’w gweithredoedd anhunanol helpu i achub bywyd dynes ifanc.

Cyflwynwyd Gwobr Dewrder Heddlu Dyfed-Powys i’r Ditectif Ringyll Katy Evans a swyddog arrall ar ôl iddynt fwrw ati i weithredu pan gawsant wybod am ddynes mewn trafferth ar lan y môr.  

Dywedodd ffrindiau bod y ddynes mewn gofid mawr. Rhedodd y Ditectif Ringyll Evans a'i chydweithiwr i’r traeth, lle’r oedd ffrindiau’n ceisio atal y ddynes rhag mynd i mewn ymhellach i’r dŵr neu gael ei chario i ffwrdd gan y tonnau cryf. 

Yn sydyn, cafodd ei chario i ffwrdd y tu hwnt i llinell ewyn y môr.

Heb hyd yn oed aros i ddiosg eu festiau trywanu neu eu beltiau offer, plymiodd swyddogion i mewn i’r dŵr ynghyd ag aelod o’r cyhoedd a brwydro eu ffordd allan at y ddynes.

Roedd y cyfuniad o’r cerrynt terfol a phenderfynoldeb y ddynes i dorri’n rhydd rhagddynt yn golygu bod pawb allan o’u dyfnder cyn pen dim.

Wrth fynd mewn i’r dŵr, roedd y Ditectif Ringyll Evans wedi gweithredu’r botwm argyfwng ar ei radio, gan hysbysu swyddogion cyfagos bod rhywbeth o’i le.

Pan gyrhaeddodd rhagor o swyddogion y promenâd, roeddent braidd yn gallu gweld y cylchoedd coch fflach o’r camerâu corff Axon a weithredwyd gan y swyddogion.

Wrth i’r swyddogion ychwanegol gyrraedd llinell y dŵr, roedd y Ditectif Ringyll Evans, swyddog arall, ac aelod o’r cyhoedd yn llwyddo i ymladd yn erbyn y cerrynt er mwyn llusgo’r ddynes yn ôl i’r lan yn ddiogel.

Yn fuan iawn, cyrhaeddodd unedau eraill ac ambiwlans, a throsglwyddwyd y ddynes drallodus i ofal parafeddygon.

Dywedodd y Rhingyll David Hawksworth, a enwebodd y ddau: “Dangosodd y ddau swyddog ddewrder arbennig ac anhunanol drwy wneud y penderfyniad i fynd mewn i’r dŵr mewn amrantiad.

“Mewn tywyllwch bron, gan ymladd yn erbyn cerrynt alltraeth cryf, does dim dwywaith y byddai’r ddynes ifanc hon wedi mynd ar goll yn y tywyllwch a chael ei chludo allan i’r môr pe na baen nhw wedi ymateb yn syth a gosod eu hunain mewn perygl difrifol o foddi.”

Cyrhaeddodd y Ditectif Gwnstabl Daniel Thomas o Uned Porthladd Doc Penfro, a achubodd ddau unigolyn a oedd wedi’u caethiwo mewn lori nwyddau, a SCCH Ian Morgan a SCCH Nia Humphries o Dîm Plismona Bro Rhydaman, a rwystrodd dynes rhag syrthio o bont, y rhestr fer ar gyfer y wobr arobryn hefyd.  

Ymunwch â ni eto fory wrth inni rannu hanes y ddau swyddog diogelwch a heriodd gyrrwr peryglus yn Sioe Frenhinol Cymru.

NODDWYD Y WOBR DEWRDER GAN | Axon – arweinydd datrysiadau symudol, rheolaeth tystiolaeth digidol a chamerâu corff ar gyfer y maes gorfodi’r gyfraith.