Gwerthwr mynych yn cael ei gyhuddo o feddu ar gyffuriau gwerth hyd at £10,000

Mae dyn wedi’i gyhuddo o feddu ar gyffuriau dosbarth A a dosbarth B â gwerth posibl o hyd at £10,000 ar y stryd yn dilyn gwarant yn Llanelli.

Aeth Heddlu Dyfed-Powys i gartref  Sanjit Sanghera ddydd Mercher 19 Mai fel rhan o ymchwiliad i gyflenwad cyffuriau ehangach yn yr ardal.

Yn fuan iawn, darganfuwyd ei fod wedi bod yn cyflenwi sylweddau anghyfreithlon ers 2018.

Dywedodd y Ditectif Ringyll Andrew Clatworthy: “Sylwodd swyddogion a aeth i’r eiddo ar arogl canabis cryf yn dod o sied yn yr ardd, lle y darganfu bagiau a oedd yn cynnwys canabis a phowdwr y credid mai canabis ydoedd.

“Arweiniodd chwiliad llawn o’r tŷ at atafaelu £4000 mewn arian parod, ynghyd â dros hanner cilogram o ganabis a thua 41 gram o gocên.  

“Mae hyn yn fwy o lawer na’r hyn y byddem yn disgwyl dod o hyd iddo ar gyfer defnydd personol rhywun.”

Daethpwyd o hyd i lawer o’r sylweddau anghyfreithlon mewn jariau gwydr â labeli bisgedi arnynt.

Amcangyfrifodd dadansoddydd cyffuriau arbenigol mai rhwng £7800 a £10,000 oedd gwerth y cyffuriau a atafaelwyd ar y stryd, gan ddibynnu ar burdeb y cocên.

Arestiwyd Sanghera, 21 oed, o Heol yr Ysgol, Morfa, ar amheuaeth o feddu ar gyffuriau â’r bwriad o werthu.

Dywedodd y Ditectif Ringyll Andrew Clatworthy: “Er ei fod wedi rhoi atebion “dim sylw” yn ystod cyfweliadau’r heddlu, yr oeddem yn medru cyflymu ein hymholiadau digidol, ac adferom dystiolaeth ardderchog i brofi ei fod wedi bod yn gysylltiedig â chyflenwi sawl cilogram o gyffuriau.

“Daethpwyd o hyd i negeseuon ar ei ffôn symudol sy’n dangos tystiolaeth o werthu cyffuriau mor bell yn ôl â 2018, sy’n dangos ei fod wedi bod yn werthwr mynych yn yr ardal.”

Cyhuddwyd Sanghera o feddu ar gyffuriau dosbarth A â’r bwriad o werthu, meddu ar gyffuriau dosbarth B â’r bwriad o werthu, a chael, defnyddio neu feddu ar eiddo troseddol - sef £4,227.

Cyfaddefodd i’r holl droseddau pan ymddangosodd gerbron Llys Ynadon Llanelli ddydd Iau 20 Mai, a chafodd ei gadw yn y ddalfa hyd nes bydd yn cael ei ddedfrydu yn Llys y Goron Abertawe ar 21 Mehefin.

Dywedodd y Ditectif Ringyll Clatworthy: “Roedd hwn yn ganlyniad ardderchog i warant, ac un yr ydym yn credu y bydd wedi aflonyddu ar giang troseddu trefnedig sy’n gweithredu yn ardal Sir Gaerfyrddin.

“Diolch i gefnogaeth gan nifer o adrannau o ran sicrhau tystiolaeth gref yn gyflym, cyfaddefodd y diffynnydd yn llawn i’r cyhuddiadau yn ei erbyn heb fod angen cynnal treial.”