Gwybodaeth a gafwyd adeg ymgyrch ‘Cwrdd â’r Stryd’ yn arwain at ganfod canabis yn cael ei

Daeth swyddogion heddlu Porth Tywyn a Chydweli o hyd i osodiad cynhyrchu canabis soffistigedig diolch i gudd-wybodaeth a gafwyd yn ystod digwyddiadau ymgysylltu cymunedol.

Cynhaliwyd gwarant yn ardal Mynyddygarreg ar ôl derbyn gwybodaeth bod y cyffur dosbarth B yn cael ei gynhyrchu yn y cyfeiriad.

 chymorth Tîm Plismona Bro Llwynhendy ac Uned Gŵn Heddlu Dyfed-Powys, chwiliodd Tîm Plismona Bro Porth Tywyn a Chydweli’r eiddo ar 29 Ebrill.

Daethpwyd o hyd i sawl planhigyn canabis mawr yn tyfu mewn ystafell sbâr, yn ogystal â nifer o fagiau bach o ganabis llysieuol.

Amcangyfrifwyd bod gwerth y cyffuriau a atafaelwyd oddeutu £1,200 i £1,500 ar y stryd.

Dywedodd y Rhingyll Gemma Davies: “Cafodd SCCH Tîm Plismona Bro Porth Tywyn a Chydweli gudd-wybodaeth yn ystod eu gwaith Cwrdd â’r Stryd arferol, gan arwain at y warant. 

“Mae SCCH yn targedu stryd wahanol yn eu hardal bob wythnos, gan siarad â phreswylwyr er mwyn mynd i’r afael ag unrhyw bryderon, sydd yna’n cael eu bwydo i mewn i gynlluniau eu tîm ac yn helpu i ffurfio blaenoriaethau.

“Datblygwyd gwybodaeth am weithgarwch anghyfreithlon posibl yn yr eiddo penodol hwn yn gyflym gan y swyddogion er mwyn galluogi camau gweithredu cyflym a phendant.

“Diolch i’w gwaith, roeddent yn medru sicrhau’r gymuned bod eu pryderon yn cael sylw – a byddant yn parhau i gael sylw.”

Cyfwelwyd â’r deiliad y diwrnod hwnnw a chafodd ei ryddhau dan ymchwiliad tra bod ymholiadau pellach yn cael eu cynnal.