Gyrrwr a wnaeth oryrru drwy bentref ym Mhowys ac ar lwybr troed yn cael ei garcharu

Mae dyn a yrrodd dros ddwywaith y terfyn cyflymder drwy bentref ym Mhowys cyn gadael y ffordd a chael ei hun ar lwybr troed wedi ei garcharu.

Rhoddodd Simon Gareth Edwards, o Ferthyr, fywydau defnyddwyr eraill y ffordd mewn perygl pan achosodd i’r heddlu ei ymlid drwy Langynidr a Thal-y-bont ar Wysg ar ddydd Gwener, Mawrth 5, 2021.

Roedd swyddogion o Uned Plismona Ffyrdd Aberhonddu o Heddlu Dyfed-Powys wedi ceisio stopio Citroen C2 du yr unigolyn 23 oed o ganlyniad i’r ffordd afreolaidd yr oedd yn cael ei yrru.

Fodd bynnag, cyflymodd Edwards a dechrau gyrru rhwng 50 a 65 milltir yr awr mewn ardal breswyl lle'r oedd y terfyn cyflymder yn 30 milltir yr awr.

Meddai’r Rhingyll Matt Thomas: “Gosodwyd rhwystr miniog ar y ffordd, ac wrth i’r car ddod i mewn i Dal-y-bont ar Wysg dadchwythwyd pob un o’r pedwar teiar.

“Ni wnaeth hyn atal Edwards, a pharhaodd i yrru tua 50 milltir yr awr. Yn y diwedd gwyrodd oddi ar y ffordd ac i lwybr tynnu camlas mewn ymgais i ddianc rhag y swyddogion.

“Gwrthdrawodd gyda ffens y gamlas cyn ffoi o’r car.”

Rhedodd y Cwnstabl James Helyer ar ôl Edwards a’i ganfod yn cuddio yn yr isdyfiant, lle cafodd ei arestio.

Yn ddiweddarach cafodd ei gyhuddo o yrru peryglus, methu â stopio pan ofynnwyd iddo wneud, gyrru pan wedi ei ddiarddel a gyrru heb yswiriant.

Ymddangosodd yn Llys y Goron Merthyr ar ddydd Gwener, Mai 14, lle cafodd ei ddedfrydu i 70 wythnos o garchar.

Meddai’r Rhingyll Thomas: “Roedd hwn yn ddigwyddiad peryglus lle wnaeth diystyrwch amlwg Edwards o ddiogelwch eraill ei roi ef, ei deithwyr a defnyddwyr eraill y ffordd mewn perygl.”