Yr Heddlu’n dod o hyd i fyrgler a oedd wedi gadael llwybr olew i’w gartref

Cyhuddwyd dyn â byrgleriaeth ar ôl gadael llwybr o olew a ddygwyd o eneradur, a arweiniodd yr heddlu o gartref y dioddefydd i’w gartref ei hun.

Llwyddodd swyddogion Heddlu Dyfed-Powys i ddod o hyd i Dominic William Oliver yn gyflym ar ôl iddo fwrglera ym Mhorth Tywyn un noson ym mis Mawrth. 

Derbyniodd yr heddlu adroddiadau am ddwy fyrgleriaeth garej a lladrad o gar dros nos ar nos Lun 8 Mawrth. Roedd generadur, gwiail pysgota, a dau fag â phasbortau ynddynt ymysg yr eitemau a ddygwyd.

Amcangyfrifwyd bod cyfanswm gwerth yr eitemau a ddygwyd tua £800.

Dywedodd y Rhingyll Gemma Davies: “Aeth swyddog i gartrefi’r dioddefwyr a chafodd wybod am y llwybr olew. Credwyd bod yr olew o’r generadur a oedd wedi’i ddwyn.

“Dilynodd y llwybr ar hyd sawl stryd - yn eu plith, y stryd lle’r oedd Oliver wedi dwyn dau fag o gar - a darganfod ei fod yn gorffen y tu allan i eiddo ar Heol Dandorlan.

“Cytunodd Oliver i ymchwiliad gwirfoddol gael ei gynnal, ac wrth i swyddogion fynd mewn i’r eiddo, yn syth, gwelsant bac milwr â phatrwm unigryw yr oedd un o’r dioddefwyr wedi’i ddisgrifio arno.”  

Gorffennwyd chwilio, gydag eitemau yr amheuwyd eu bod wedi’u dwyn yn cael eu hadfer o’r cyfeiriad, ac arestiwyd y dyn 31 oed ar amheuaeth o fyrgleriaeth o fewn 6 awr ar ôl i’r digwyddiadau gael eu hadrodd.  

Wrth iddo gael ei gludo i ddalfa’r heddlu, gwnaeth Oliver sylw arwyddocaol a oedd yn ei gysylltu â lladrad y generadur.

Cafodd ei gyhuddo â dau achos o fyrgleriaeth ac un achos o ladrata, ac ymddangosodd yn Llys y Goron Abertawe i gael ei ddedfrydu ddydd Gwener 30 Ebrill.

Cafodd ei ddedfrydu i 12 mis o garchar wedi’i atal am 18 mis, rhaid iddo gwblhau gofyniad adsefydlu, a rhaid iddo aros yn ei gyfeiriad cartref rhwng 8y.h. a 6y.b. am dri mis.

Dywedodd y Rhingyll Davies: “Roedd hwn yn ymateb ardderchog, a arweiniodd at arestio a chyhuddo Oliver yn gyflym, a’r eiddo a ddygwyd yn cael ei adfer a’i ddychwelyd i’r dioddefwyr y diwrnod y cawsom wybod am y troseddau.

“Heb os, mae hyn wedi cael effaith gadarnhaol ar breswylwyr Porth Tywyn, sydd wedi cyflwyno sylwadau cadarnhaol am y ffordd yr ymchwiliwyd i’r mater.

“Ymgysylltwyd â’r gymuned, cynhaliwyd patrolau a dosbarthwyd taflenni atal trosedd ar ôl yr ymchwiliad er mwyn rhoi tawelwch meddwl a chyngor.”