Dau ddyn wedi eu dedfrydu am fyrgleriaethau a lladradau cerbydau yng nghefn gwlad Powys.

Dedfrydwyd Michael Evans, 34 oed, o Ferthyr Tudful yn Llys y Goron Abertawe ar 20 Hydref 2021 i 2 flynedd o garchar ar ôl pledio’n euog i ladrad cerbyd Land Rover o fferm yn Llan-gors, lladrad cerbyd Mitsubishi L200 o fferm yn Llan-gors eto, byrgleriaeth yn Llan-gors, a lladrad beic cwad arall o ardal Brilley. Cyflawnwyd y troseddau yn 2019.

Cysylltwyd Michael Evans â’r troseddau yn y lle cyntaf drwy ymholiadau ffôn symudol. Cafodd ei arestio ar 22 Tachwedd 2019 a chanfu nifer o blatiau rhif wedi’u clonio yn ei feddiant a oedd yn ei gysylltu â byrgleriaeth yn ardal Brilley, lle y dygwyd beiciau cwad, fan wersylla ac arfau. Daethpwyd o hyd i’r fan wersylla yn Abertawe’r diwrnod canlynol yn dilyn ymlid heddlu. Roedd platiau rhif ffug ar y cerbyd.  

Pan arestiwyd Evans, adferwyd esgidiau a chawsant eu harchwilio am dystiolaeth fforensig. Roedd yr olion esgidiau yn lleoliadau’r troseddau’n cyfateb â’r esgidiau y daethpwyd o hyd iddynt yn ei gyfeiriad cartref.

Ymddangosodd Simon Lester yn Llys y Goron Abertawe ar 26 Hydref 2021 a chafodd ei ddedfrydu i 18 mis o garchar ar ôl pleidio’n euog i gyhuddiadau o drin nwyddau wedi’u dwyn.

Pan arestiwyd Lester ym Merthyr Tudful ar 4 Ionawr 2020, daethpwyd o hyd i allweddi car Ford yn ei feddiant a oedd yn datgloi car Ford Fiesta y daethpwyd o hyd iddo gerllaw. Dangosodd gwiriadau bod y cerbyd hwn wedi’i ddwyn o ardal Crucywel tra bod y preswylydd oedrannus gartref yn cysgu.  

Daethpwyd o hyd i’w olion bysedd ar y platiau rhif wedi’u clonio ar y fan wersylla a oedd wedi’i dwyn. Daeth swyddogion o hyd i neges destun yr anfonodd Evans at Lester y bore wedi’r fyrgleriaeth. Roedd y neges destun honno’n cynnwys manylion y cerbyd a oedd â’r rhif cofrestru wedi’i glonio.  

Cyhuddwyd Lester o drin nwyddau wedi’u dwyn ar gyfer y ddwy drosedd hyn.

Daethpwyd o hyd i negeseuon testun pellach ar ffôn Evans a oedd yn dangos trafodaethau ynghylch dwyn beiciau cwad a cherbydau 4 x 4.

Dywedodd y Rhingyll Thomas Songhurst:

“Gall byrgleriaethau cael effaith ddinistriol ar ddioddefwyr, ac ry’n ni wedi ymrwymo i ddal y rhai sy’n gyfrifol a’u rhoi gerbron y llysoedd. Roedd gwaith fforensig a theleffoni’n hollbwysig ar gyfer cysylltu’r ddau ddiffynnydd i’w gilydd a’r troseddau. Roedd y dystiolaeth yn ddigon cryf fel eu bod wedi pledio’n euog, a chawsant eu dedfrydu i garchar.”