Diwrnod Rhuban Gwyn 2021

Mae Heddlu Dyfed-Powys yn falch o gefnogi'r ymgyrch i ddiddymu trais yn erbyn menywod gan ddynion eto eleni.

Mae’r heddlu wedi sefyll yn erbyn pob math o drais gan ddynion yn erbyn menywod drwy fod ȃ Achrediad Rhuban Gwyn, ac mae'r baner Rhuban Gwyn yn hedfan uwchben y Pencadlys yng Nghaerfyrddin.

Ymgyrch fyd-eang sy’n annog pobl, yn arbennig dynion a bechgyn, i weithredu a newid yr ymddygiad a’r diwylliant sy’n arwain at gam-drin a thrais yw’r Ymgyrch Rhuban Gwyn. Mae gwisgo rhuban gwyn yn golygu addo peidio byth â chyflawni trais yn erbyn menywod, esgusodi trais o’r fath gan ddynion, na chadw’n dawel amdano.

Bob blwyddyn mae gwasanaethau a phartneriaid cam-drin domestig yn cynnal digwyddiadau i godi proffil yr ymgyrch a Diwrnod Rhuban Gwyn, sy'n digwydd ar Tachwedd 25.

Dywedodd y Prif Gwnstabl Dros Dro Claire Parmenter: “Rwy’n falch fy mod yn gwisgo fy rhuban gwyn heddiw ac yn cefnogi’r ymgyrch fyd-eang i ddod â thrais yn erbyn menywod i ben.

“Mae angen i ddioddefwyr fod â’r hyder i adrodd ar gam-drin domestig, ac mae hwn yn gyfle i ddangos fy ymrwymiad i weithio gyda phartneriaid i ddarparu’r cymorth a’r gefnogaeth sydd eu hangen arnyn nhw. Rwy’n falch ein bod yn parhau â’n hachrediad Rhuban Gwyn, gan ddangos ein hymrwymiad i sefyll yn gadarn a mynd i’r afael â phob trais yn erbyn menywod.”

Dywedodd Comisiynydd yr Heddlu a Throsedd, Dafydd Llywelyn: “Mae’r Ymgyrch Rhuban Gwyn yn tynnu sylw at neges bwysig i ni bob blwyddyn: Creu dyfodol heb drais dynion yn erbyn menywod.

“Mae'r math hwn o gam-drin yn effeithio ar blant yn ogystal â dioddefwyr, ac mae'r effeithiau'n aml yn para'n hir a gallent gynyddu bregusrwydd oedolion yn sylweddol.

“Mae’n flaenoriaeth inni weithio gyda phartneriaid i sicrhau eu bod yn cael y cymorth a’r gefnogaeth sydd eu hangen arnynt.

“Ymunwch â ni i addo i beidio byth ag ymrwymo, cydoddef neu aros yn dawel am drais yn erbyn menywod. Rydym yn parhau i ddal ein statws achrededig Rhuban Gwyn y DU, gan weithio ar gynllun gweithredu i gyflawni'r gwasanaeth gorau i ddioddefwyr a goroeswyr.”

Derbyniodd Heddlu Dyfed-Powys achrediad o ganlyniad i weithio gyda Rhuban Gwyn y DU i lunio cynllun gweithredu 3 blynedd ar gyfer gosod y nodau a fydd yn sicrhau ein bod ni’n mynd i’r afael â thrais yn erbyn menywod. Y cynllun gweithredu yw’n hymrwymiad tuag at sicrhau ein bod ni’n cyflawni’r gwasanaeth gorau ar gyfer dioddefwyr a goroeswyr, a’n bod ni’n gwella lle bynnag y bo’n bosibl.  

Mae Diwrnod Rhuban Gwyn yn cychwyn 16 diwrnod o weithredu, ar draws partneriaeth ranbarthol Dyfed Powys.

Mi roedd y ddau ddarparwr gwasanaeth DAS Threshold a Goleudy yng Nghanolfan Elli yn Llanelli ar Ddiwrnod y Rhuban Gwyn i siarad am Drais yn erbyn Menywod.

Bydd Heddlu Dyfed-Powys hefyd yn codi ymwybyddiaeth o Stelcio Seiber gyda phartneriaid a  thimau cam-drin domestig fel eu bod yn gwybod sut i gynghori dioddefwyr i gadw'n ddiogel rhag y math hwn o gam-drin, a chwalu chwedlau ynghylch cam-drin pobl hŷn, er mwyn helpu i chwalu rhwystrau a’u hannog i adrodd.

Bydd Cyngor Sir Caerfyrddin yn goleuo Neuadd y Sir mewn porffor i adlewyrchu lliwiau'r llinell gymorth Byw Heb Ofn, ac maent wedi creu fideo i godi ymwybyddiaeth - https://vimeo.com/643902376.

Am ragor o wybodaeth ynglŷn â’r ymgyrch rhuban gwyn, neu er mwyn tyngu llw i ddod â thrais yn erbyn menywod i ben, galwch heibio i www.whiteribboncampaign.co.uk

Gall unrhyw un sy’n teimlo ei fod yn cael ei gam-drin, neu sy’n poeni am ffrind neu aelod o’r teulu, alw’r heddlu ar 101, neu riportio arlein https://bit.ly/DPP101Online  Gallwch hefyd alw Byw Heb Ofn ar 0808 80 10 800.

I ddysgu mwy am Byw Heb Ofn, ewch i www.livefearfree.gov.wales

Am gymorth cyfrinachol am ddim, cysylltwch â Goleudy, gwasanaeth sydd wedi’i gomisiynu ar gyfer dioddefwyr a thystion trosedd. Galwch 0300 123 2996, e-bostiwch [email protected].

Arwyddion i gadw llygad allan amdanynt::

• Maent yn ymddangos yn ofnus o’u partner neu aelod o'r teulu, neu'n awyddus iawn i'w plesio
• Mae eu partner yn aml yn beirniadu neu'n bychanu'r llall o flaen pobl
• Gallant fod yn absennol o'r gwaith neu achlysuron cymdeithasol - cael eu hynysu oddi wrth ffrindiau, cydweithwyr a theulu
• Gallwch weld anafiadau corfforol (cleisiau, esgyrn wedi torri, ysigiadau, toriadau ac ati) ac efallai eich bod wedi cael esboniad annhebygol am anafiadau rheolaidd
• Maent yn amharod i adael plant gyda'u partner
• Tystiolaeth o ddifrod i'w heiddo
• Mwy o ddibyniaeth ar alcohol neu gyffuriau
• Diffyg hunan-barch neu newidiadau mewn personoliaeth
• Mae eu partner yn gwirio arnynt yn gyson, yn negeseua, yn ffonio neu'n troi i fyny yn annisgwyl

Am gefnogaeth a chyngor:

• Galwch y llinell gymorth cam-drin a thrais Byw Heb Ofn am ddim ar 0808 8010 800
• Lawrlwythwch yr ap Brightsky am ddim – mae’n llawn o wybodaeth ac mae ganddo osodiad cyfrinachol er mwyn helpu i ddiogelu’ch preifatrwydd
• Galwch heibio i Gofyn am wybodaeth o dan Gyfraith Clare: Gwneud cais Cynllun Datgelu Trais Domestig (DVDS) | Heddlu Dyfed-Powys i ddysgu am gynllun lle y cewch ddarganfod pa un ai a oes gan eich partner presennol, neu bartner posibl, hanes o drais neu gam-drin
• Galwch heibio i ncdv.org.uk am gyngor cyfreithiol am ddim yn gyflym

Os ydych chi’n rhoi gwybod i’r heddlu am gam-drin wrth iddo ddigwydd, galwch 999.