Wobr Ymrwymiad i Ddysgu
Cynnwys y prif erthygl
Mae tîm o Swyddogion Cefnogi Cymunedol yr Heddlu (SCCH) a weithiodd ‘fel lladd nadroedd’ yn ystod y pandemig er mwyn cael gwell dealltwriaeth o’r heriau sy’n wynebu’r gymuned fyddar wedi ennill gwobr.
Enwyd Aimee Bartlett, Miranda Whateley, Rachel Williams (Powys), Dan Brown, Joshua Chapman (Sir Gaerfyrddin), Charlotte Carter, Nia Williams (Ceredigion), Bethan Hawkridge a Zoe Monk (Sir Benfro) yn enillwyr y wobr Ymrwymiad i Ddysgu yn seremoni wobrwyo flynyddol 2021 Heddlu Dyfed-Powys ddydd Iau 18 Tachwedd.
Aeth y naw SCCH i sesiynau Iaith Arwyddion Prydain wythnosol gyda’r cwmni o Gaerffili Deaf Learning Solutions, gan gyflawni dros 150 o oriau astudio a sicrhau cymwysterau lefel 2.
Dywedodd eu tiwtor, Sarah Lawrence, bod y grŵp wedi arddangos ymrwymiad arbennig tuag at ddysgu’r iaith weledol, a hefyd wedi ymgyfarwyddo â hanes a diwylliant y gymuned fyddar, a’r heriau sy’n wynebu pobl fyddar.
Dywedodd Sarah, sy’n fyddar ei hun, bod “awydd a dyhead” y grŵp i ddysgu ei hiaith wedi llonni ei chalon.
“Fel aelod o’r gymuned fyddar, mae’n dda iawn gennyf ddweud bod pob un ohonynt yn ei ‘deall’ – yr unigedd a’r rhwystrau sy’n wynebu pobl fyddar wrth geisio cael mynediad at unrhyw fath o wasanaeth,” meddai.
“Drwy ddysgu iaith arwyddion Prydain, maen nhw wedi newid y ddynameg honno’n llwyr, y diffyg ffydd o fewn y gymuned fyddar ac weithiau’r diffyg dealltwriaeth.
“Drwy iaith a rennir, mae gan Heddlu Dyfed-Powys fwy o wybodaeth a dealltwriaeth yn awr o’r rhwystrau mae pobl yn eu hwynebu wrth gael mynediad at wasanaethau plismona.”
Dywedodd fod y cwrs nid yn unig wedi rhoi sgil a allai achub bywydau i naw unigolyn, yr oedd hefyd wedi helpu i’w timoedd ehangach ddatblygu perthnasau cymunedol pwysig na fyddai’n bosibl fel arall.
Ychwanegodd Sarah, “Dylai Heddlu Dyfed-Powys fod yn falch ohonynt: Rwy’n gwybod fy mod i.”
Mae Gwobrau Blynyddol Heddlu Dyfed-Powys yn dathlu llwyddiannau a chyfraniadau staff, swyddogion, gwirfoddolwyr ac asiantaethau partner ar draws yr ardal heddlu.
Cyflwynwyd eu gwobr i’r enillwyr mewn seremoni rithwir a gynhaliwyd ddydd Iau 18 Tachwedd.