Aflonyddu ar gyflenwi cyffuriau yn ystod wythnos ddwysáu llinellau cyffuriau

Cyflawnodd swyddogion o Heddlu Dyfed-Powys 11 cyrch yn ystod wythnos o weithredu ar gyfer mynd i’r afael â gangiau llinellau cyffuriau.

Gwelodd wythnos ddwysáu llinellau cyffuriau (Dydd Llun 11 Hydref i ddydd Sul 17 Hydref) swyddogion yn cynnal gwarantau, rhyng-gipio cerbydau a oedd o bosibl yn gysylltiedig â chyflenwi cyffuriau, ac yn cydweithio â phartneriaid er mwyn codi ymwybyddiaeth o droseddau sy’n gysylltiedig â chyffuriau.  

Arestiwyd 17 unigolyn yn ystod yr wythnos, ac atafaelwyd crac cocên (0.8 gram), heroin (77 gram) a chocên (6 gram).

Amcangyfrifir mai tua £4,500 yw gwerth y cyffuriau hynny, tra bod swyddogion wedi atafaelu £6,500 o dan y Ddeddf Elw Troseddau.

Atafaelwyd pastwn ymestynnol a chylchgrawn ffrwydron rhyfel hefyd.

Dywedodd y Ditectif Brif Arolygydd Dros Dro Andrew Cotterell: “Roedd yr wythnos ddwysáu llinellau cyffuriau’n llwyddiant ar gyfer Heddlu Dyfed-Powys, a chawsom nifer o ganlyniadau ardderchog diolch i waith rhagweithiol swyddogion a staff yr heddlu ar draws y pedwar rhanbarth.”

Yn ogystal â gwarantau rheng flaen a gwaith heddlu, digwyddodd llawer tu ôl i’r llenni hefyd, gan arwain at:

• Dros 2,000 o bobl yn cael eu haddysgu am linellau cyffuriau a chamfanteisio yn ystod yr wythnos ddwysáu o fewn y gymuned ac asiantaethau partner.
• Tua 50 o werthwyr tai/asiantaethau gosod yn cael eu haddysgu am beryglon troseddolrwydd, megis llinellau cyffuriau mewn eiddo rent.
• Dros 150 o fusnesau’n cael eu haddysgu am linellau cyffuriau, â phwyslais ar y rhai sy’n darparu gwasanaethau credyd ffôn symudol a’r defnydd o ffonau rhagdal.
• Derbyniodd 50 o blant, pobl ifainc ac oedolion sy’n agored i niwed neu mewn perygl o niwed gymorth diogelu targedig un i un ac mewn grŵp.

Ychwanegodd y Ditectif Brif Arolygydd Cotterell: “Ychydig iawn o bobl sy’n ymwybodol o’r gwaith sy’n digwydd tu ôl i’r llenni er mwyn cefnogi dioddefwyr, neu’r mesurau a roddwyd mewn grym er mwyn atal pobl rhag dod yn ddioddefwyr mynych troseddau sy’n gysylltiedig â chyffuriau.”

“Mae’n bwysig iawn i ni fel heddlu ein bod ni hefyd yn cymryd ymagwedd sy’n canolbwyntio ar y dioddefydd tuag at weithio gyda’r rhai sydd wedi’u heffeithio gan y gangiau hyn i’w hatal rhag dod yn ddioddefwyr mynych, yn ogystal â gweithredu ar unrhyw gudd-wybodaeth newydd ar gyfer aflonyddu ar linellau cyffuriau.”