AFON CLEDDAU | Diweddariad ac apêl mewn perthynas ag achubiaeth amlasiantaeth o’r afon
Cynnwys y prif erthygl
Mae tri unigolyn wedi marw ac mae un dal yn yr ysbyty yn dilyn achubiaeth amlasiantaeth o’r afon yn Sir Benfro ddoe.
Derbyniodd Heddlu Dyfed-Powys adroddiadau am bobl mewn trafferth yn yr afon Cleddau, Hwlffordd, ychydig ar ôl 9 o’r gloch fore ddydd Sadwrn 30 Hydref.
Roedd grŵp o naw oedolyn wedi teithio o ardal de Cymru i Sir Benfro er mwyn padlfyrddio.
Mae union amgylchiadau’r digwyddiad yn cael eu hymchwilio, ond credir bod y grŵp wedi mynd i drafferth yn y dŵr.
Yn drist, bu farw dwy ddynes a dyn yn y fan a’r lle, ac mae un ddynes dal mewn cyflwr difrifol yn yr ysbyty. Mae’r perthnasau agosaf yn cael eu cefnogi gan Swyddogion Cyswllt Teulu arbenigol.
Achubwyd pum unigolyn arall a oedd heb ddioddef anafiadau.
Credir bod aelod o’r cyhoedd wedi mynd mewn i’r dŵr hefyd er mwyn ceisio achub y bobl hyn, gan adael y dŵr yn ddiogel yn ddiweddarach.
Caewyd Stryd y Cei am sawl awr, a gofynnwyd i’r cyhoedd osgoi’r ardal tra bod yr afon yn cael ei chwilio.
Cynorthwyodd 30 swyddog tân o Wasanaeth Tân ac Achub Canolbarth a Gorllewin Cymru â’r achubiaeth, gan gynnwys criwiau arbenigol sy’n mynd i’r dŵr a thimoedd achub dŵr. Lansiwyd dau gwch tân i gynorthwyo â chwiliadau yn yr afon ac ar lan yr afon, a bu criwiau’n gweithio’n agos â’r timoedd Gwylwyr y Glannau a oedd yn bresennol.
Cafwyd cymorth hofrennydd gan Wasanaeth Awyr Cenedlaethol yr Heddlu, Gwylwyr y Glannau ac Ambiwlans Cymru, a defnyddiwyd bad achub Sefydliad Cenedlaethol Brenhinol y Badau Achub Angle hefyd. Ymatebodd Gwasanaeth Ambiwlans Cymru â sawl ambiwlans, gan fynd â’r ddynes a oedd wedi’i hanafu i Ysbyty Llwynhelyg.
Roedd dros 20 swyddog heddlu’n bresennol yn y lleoliad, a oedd ar gau tan tua 5 o’r gloch y prynhawn hwnnw.
Dywedodd y Ditectif Brif Arolygydd Jonathan Rees bod ymchwiliad llawn eisoes ar waith, ond ar hyn o bryd, roedd ei feddwl ar anwyliaid y rhai a oedd wedi marw a’r padlfyrddiwr sydd dal yn yr ysbyty.
Diolchodd i gydweithwyr yn y gwasanaethau brys am eu cymorth cyflym, ac i’r cyhoedd am eu hamynedd drwy gydol y digwyddiad.
Mae’r Ditectif Brif Arolygydd Rees wedi apelio ar i unrhyw un sydd â gwybodaeth a allai helpu’r ymchwiliad i gysylltu drwy wefan ddynodedig, sef https://orlo.uk/HaverfordwestAppeal_naaDd.
Mae Crwner EM, yr Awdurdod Gweithredol Iechyd a Diogelwch a’r Gangen Ymchwilio Damweiniau Morol wedi’u hysbysu.
Dywedodd llefarydd ar ran y Gangen Ymchwilio Damweiniau Morol: “Mae tîm o ymchwilwyr o’r Gangen Ymchwilio Damweiniau Morol wedi mynd i Hwlffordd i gynnal asesiad cychwynnol o’r ddamwain, gan gydweithio ag asiantaethau eraill.
“Nod asesiad cychwynnol y Gangen Ymchwilio Damweiniau Morol yw helpu i bennu’r ffordd ymlaen.”
A oeddech chi'n dyst i’r digwyddiad, a oes gennych fideo o badlfyrddwyr yn yr ardal ar yr amser perthnasol, na a oes gennych gwybodaeth gall helpu ein hymchwiliad?