Dedfryd oes i fab Judith Rhead am ei llofruddiaeth

Mae dyn a lofruddiodd ei fam â morthwyl, ac a barhaodd i fyw yn ei chartref gyda’i chorff, wedi’i ddedfrydu i oes o garchar.

Bydd Dale Morgan, 43 oed, o Honeyborough Green, Neyland, yn treulio isafswm o 21 mlynedd a chwech mis yn y carchar ar ol cael ei ddedfrydu yn Llys y Goron Abertawe am lofruddio Judith Rhead.  

Cafwyd hyd i'w chorff yn ei chartref ar Stryd y Farchnad, Doc Penfro, ddydd Sadwrn 20 Chwefror 2021. Cafodd ei tharo 14 o weithiau ar ei phen â’r morthwyl y daeth swyddogion Heddlu Dyfed-Powys o hyd iddo ar y llawr ger ei chorff.

Arestiwyd Morgan yn ddiweddarach y diwrnod hwnnw ac mae wedi bod yn y ddalfa ers hynny, gan bledio’n euog i lofruddiaeth mewn gwrandawiad ar 31 Awst.  

Dywedodd yr Uwch Swyddog Ymchwilio, y Ditectif Uwch-arolygydd Jayne Butler, bod yr ymchwiliad wedi gweld adrannau ar draws yr heddlu’n cyd-dynnu er mwyn cael cyfiawnder i Judith a’i theulu, sydd mewn galar.

“Dioddefodd Judith Rhead ymosodiad erchyll,” meddai. “Roedd y ffaith bod hyn dan law ei mab ei hun ac yn ei chartref ei hun ond yn ychwanegu at greulondeb ac erchylltra’r hyn a ddioddefodd.

“Gweithiodd ein swyddogion yn galed er mwyn dal ei llofrudd a’i ddwyn i gyfiawnder, a gyflawnwyd yn brydlon a phroffesiynol.

“Roedd yr ymchwiliad yn ymrwymiad mawr, a hoffwn ddiolch i bawb a oedd yn gysylltiedig â dod i’r penderfyniad hwn heddiw.

“O’r swyddogion a warchododd y lleoliad ac a gyflawnodd ymholiadau o dŷ i dŷ i’r ymchwilwyr, dylai pob un ohonynt fod yn falch eu bod wedi helpu i sicrhau cyfiawnder ar gyfer Judith.”

Gwelwyd Judith yn fyw ddiwethaf ar 11 Rhagfyr, a chredir ei bod wedi’i llofruddio cyn y Nadolig gan fod anrhegion heb eu hagor dal yn ei chartref.  

Parhaodd Morgan i fyw yn fflat ei fam wrth iddo geisio cuddio’r hyn yr oedd wedi’i wneud, gan gerdded ei chi a dweud celwydd wrth ei ffrindiau, a oedd yn poeni amdani, pan holasant lle’r oedd hi.

Ar ôl iddo gael ei arestio, ni atebodd Morgan unrhyw gwestiwn a ofynnwyd iddo wrth gael ei gyfweld, ac nid yw dal wedi rhoi unrhyw fath o gyfrif o’r hyn ddigwyddodd na rheswm pam.

Fodd bynnag, ar 23 Chwefror 2021, wrth aros am ddolen fideo i’r llys, dywedodd y diffynnydd wrth swyddog, “Â bod yn onest, mae’n ryddhad bod pethau fwy neu lai allan o’m dwylo i nawr.”

Er nad oedd modd iddynt ddod o hyd i gymhelliad pendant, llwyddodd ymchwilwyr i brofi bod Morgan yn defnyddio cyfrif banc Judith a’i bod hi’n credu ei fod yn cymryd ei chyffuriau presgripsiwn.

Ychwanegodd y Ditectif Ringyll Butler: “Hoffwn ddiolch i deulu a ffrindiau Judith am eu gonestrwydd, amynedd ac urddas drwy gydol yr ymchwiliad.

“Mae ein meddyliau ni gyda nhw, a gobeithiwn y bydd y ddedfryd hon yn rhoi rhyw fath o ben ar y mater ac yn eu caniatáu i alaru amdani.”