Dedfryd ohiriedig gyrrwr ar ôl ceisio osgoi trosedd foduro trwy gelwydd

Mae gyrrwr a wnaeth geisio osgoi trosedd foduro trwy ddweud celwydd wedi derbyn dedfryd o garchar ohiriedig wedi i swyddogion o Heddlu Dyfed-Powys ddarganfod y gwir.

Cafodd Daniel Jones, 34 oed, o Lôn Helyg, y Drenewydd ei erlyn am wyrdroi cwrs cyfiawnder yn dilyn rhoi enw ffug pan anfonwyd Hysbysiad o Fwriad i Erlyn iddo am drosedd gyrru.

Ar y 14eg o Fedi 2019, roedd seiclwr yn teithio ar hyd yr A4811, Ffordd Llanidloes, y Drenewydd, pan oddiweddwyd ef yn rhy agos gan Landrover Freelander.

Daliwyd y digwyddiad ar ddyfais debyg i gamera cerbyd ac adroddwyd amdano i’r heddlu drwy borth Gan Bwyll: Ymgyrch Snap fel achos o yrru diofal.

Ar yr 20fed o Fed 2019, anfonwyd yr Hysbysiad o Fwriad i Erlyn i Jones, y perchennog cofrestredig.

Dychwelodd Jones, gyrrwr Cerbyd Nwyddau Trwm, y ffurflen enwi gyrrwr heb ei chwblhau ac yn dilyn hynny anfonwyd nodyn atgoffa ato.

Ar y 18fed o Dachwedd 2019, derbyniodd yr heddlu ail ymateb gan Jones yn enwi Rodney Evans fel y gyrrwr ar yr amser pan gyflawnwyd y drosedd.

Darparwyd dyddiad geni ffug hefyd a chyfeiriad ger Trefaldwyn. Ond datgelodd ymholiadau gan swyddogion fod hyn yn enwi ffug gan Jones.

Ar yr 31ain o Orffennaf 2020, yng Ngorsaf Heddlu’r Drenewydd, cynhaliodd y Cwnstabl John Whiles gyfweliad gyda Jones a ddarparodd gyfweliad “Dim Sylwad”, ond hefyd gwadodd unrhyw wybodaeth o dderbyn y dogfennau a anfonwyd ato na chael unrhyw gysylltiad gyda’r dogfennau hynny.

Yn dilyn hynny cyflwynwyd y dogfennau i’w harchwilio am olion bysedd, a datgelodd hyn fod Jones wedi gadael ôl ar y ffurflen.

Ceisiwyd cyngor ynghylch cyhuddo gan Wasanaeth Erlyn y Goron lle cafodd Jones yn y diwedd ei wysio am wyrdroi cwrs cyfiawnder drwy roi enw ffug mewn ymgais i osgoi erlyniaeth.

Mynnodd Jones ei fod yn ddiniwed gan wadu unrhyw wybodaeth a pharhaodd i gynnal y celwydd drwy bledio’n ddieuog hyd at ddiwrnod yr achos yn Llys y Goron yr Wyddgrug ar ddydd Llun, y 27ain o Fedi 2021, pan newidiodd ei ble i euog.

Meddai’r Rhingyll Ian Price: “Dangosodd y Swyddog yn yr Achos (SYA/OIC), y Cwnstabl Whiles, gadernid mawr wrth wrthod derbyn celwydd Jones wrth iddo geisio osgoi cael ei erlyn am drosedd moduro a fyddai fwy na thebyg ond wedi arwain at bwyntiau.

“Yn y diwedd cafodd ei erlyn am drosedd mwy difrifol a derbyn dedfryd o garchar ohiriedig.

“Fel y mae hyn yn dangos, bydd ceisio dweud celwydd yn tanio’n ôl arnoch, byddwn yn darganfod y gwir a byddwch yn cael eich erlyn.

“Dyma’r chweched euogfarn yn olynol i’r Cwnstabl Whiles ei sicrhau fel SYA am wyrdroi cwrs cyfiawnder yn y pedwar mis diwethaf, a hynny mewn achosion a gychwynnodd fel troseddau traffic y ffordd.”

Roedd gan Jones euogfarn o Ionawr 2019 am fethu ag enwi gyrrwr mewn perthynas â throsedd goryrru cynharach lle cafodd chwe phwynt cosb ar ei drwydded yrru.

Derbyniodd Jones ddedfryd o bedwar mis o garchar wedi ei gohirio am 12 mis, gyda gorchymyn cyrffyw, 6pm hyd at 6am, o dri mis.