Teyrnged rhieni i ‘ferch fach berffaith’ yn dilyn gwrthdrawiad angheuol yn Llanelli

Mae rhieni merch fach 6 mis oed a laddwyd mewn gwrthdrawiad yn Llanelli ddydd Gwener (8 Hydref) wedi talu teyrnged i’w “merch fach berffaith”, gan ddweud ei bod hi’n “rodd gan Dduw”.

Bu farw Eva Maria Nichifor yn dilyn gwrthdrawiad rhwng BMW cyfres 3 glas a Vauxhall Vectra glas wrth y groesffordd yn Heol Goffa, Llanelli, tua 9 o’r gloch y nos.  

Mae rhieni Eva Maria, Florin a Carmen, sy'n dod o Romania yn wreiddiol ond sydd nawr yn byw yn Llanelli, wedi cyhoeddi’r deyrnged isod yn Gymraeg a Romaneg.

“Yr ydym wedi’n llorio gan ein colled. Bydd pawb ohonom yn gweld eisiau Eva Maria, a oedd ond yn chwe mis oed.

“Hi oedd ein gwyrth, ein merch fach berffaith, rhodd gan Dduw. Bydd hi bob amser yn ein calonnau.

“Hoffem ddiolch i bawb am eu cefnogaeth yn ystod y cyfnod erchyll hwn. Y mae wedi golygu cymaint i’r teulu cyfan.

“Hoffem amser nawr i alaru, a gofynnwn am breifatrwydd i wneud hynny.”

Cyfieithiad Romaneg:

Suntem foarte supărați pentru pierderea noastră. Eva Maria, avea doar 6 luni si cu toții ii vom simți lipsa.

Ea a fost minunea noastră, un copil perfect și un dar dat de Dumnezeu. Va fi in inimile noastre pentru totdeauna.

Va mulțumim tuturor pentru susținerea voastră in aceste vremuri dificile, înseamnă foarte mult pentru noi.

Am vrea acum puțin timp sa ne adunam in liniște alături de familia noastră.

Mae dynes wedi’i chyhuddo o achosi marwolaeth Eva Maria drwy yrru’n beryglus.

Cadwyd Lucy Dyer 23 oed, o Rodfa Heulwen, Llanelli, yn y ddalfa yn dilyn y gwrandawiad llys yn Llys Ynadon Llanelli ddydd Llun (11 Hydref). 

Bydd hi’n ymddangos gerbron Llys y Goron Abertawe ddydd Gwener 12 Tachwedd. Cafodd ei chyhuddo o yfed a gyrru hefyd.