Cyngor Heddlu Dyfed-Powys ar ddefnyddio e-sgwteri sy'n eiddo preifat

Mae e-sgwteri, a elwir weithiau’n sgwteri trydanol, sy'n eiddo preifat yn dod yn fwy poblogaidd ac yn cael eu defnyddio’n amlach.

Fodd bynnag, y mae ar hyn o bryd yn anghyfreithlon eu defnyddio ar ffyrdd cyhoeddus, palmentydd neu lwybrau seiclo yng Nghymru.

Yr unig fan lle gellir reidio e-sgwter yn gyfreithlon yw ar dir preifat gyda chaniatâd perchennog y tir – mae pob man arall yn erbyn y gyfraith.

Mae unrhyw un sy’n ystyried prynu e-sgwter i’w ddefnyddio ar ffyrdd cyhoeddus, palmentydd neu lwybrau seiclo mewn perygl o dderbyn dirwy o £300, chwe phwynt cosb ar eu trwydded yrru a gweld ei e-sgwter yn cael ei atafaelu.

Yn ogystal, i unrhyw yrrwr neu reidiwr beic modur sydd wedi pasio’u prawf gyrru yn y ddwy flynedd diwethaf, gallai hyn arwain at waharddiad gyrru a’r angen i ailsefyll y prawf theori a hefyd y prawf gyrru ymarferol.

Mae treialon e-sgwteri i’w llogi’n cael eu cynnal mewn rhai rhannau o Loegr, ond dylent gael eu defnyddio o fewn yr ardal leol sy’n cynnal y treial yn unig.

Dywedodd y Prif Arolygydd Thomas Sharville, o’r Adran Gweithrediadau Arbenigol:

“Byddwn yn atgoffa unrhyw un sy’n ystyried prynu e-sgwter ei bod yn anghyfreithlon defnyddio e-sgwter sy’n eiddo preifat ar ffyrdd cyhoeddus, palmentydd neu lwybrau seiclo. Gall eu cyflymder a’u tawelwch achosi perygl arwyddocaol i ddefnyddwyr eraill y ffyrdd ac i ddiogelwch cerddwyr, yn enwedig cerddwyr agored i niwed.”