Ymgyrch Seabird

Ar 14 Ebrill 2022, bydd Heddlu Dyfed-Powys yn cymryd rhan yn Ymgyrch Seabird gyda'r Gymdeithas Frenhinol er Atal Creulondeb i Anifeiliaid, Cyfoeth Naturiol Cymru a heddluoedd eraill Cymru. Ymgyrch genedlaethol yw Ymgyrch Seabird sy’n anelu i ennyn diddordeb pobl a’u haddysgu am sensitifrwydd yr arfordir, a sut y gallai newidiadau syml mewn ymddygiad leihau’r pwysau ar ein bywyd gwyllt unigryw.  

Felly, pa fath o aflonyddu ar fywyd gwyllt sy’n digwydd ar arfordir Cymru?

Gwrthdrawiadau: Unrhyw wrthdrawiad rhwng unrhyw ran o fad ac anifail morol byw yw gwrthdrawiad llong. Mae gwrthdrawiadau’n aml yn arwain at drawma corfforol neu farwolaeth ar gyfer y bywyd gwyllt morol.

Aflonyddwch sŵn: Gall sŵn gormodol aflonyddu ar fywyd gwyllt, gan achosi newidiadau amlwg mewn ymddygiad. Gall hefyd ymyrryd ar allu anifail i gyfathrebu, llywio, osgoi perygl a dod o hyd i fwyd, gan effeithio yn y pen draw ar iechyd a goroesiad nifer o rywogaethau morol.

Aflonyddwch gweledol: Mae tystiolaeth bod ymddygiad anifeiliaid morol yn newid yn negyddol ym mhresenoldeb gweithgarwch dynol. Mae gan unrhyw weithgarwch y potensial i achosi aflonyddwch gweledol a gall achosi gofid, amser gorffwys llai, ymddygiad osgoi neu ymddygiad ymosodol mewn bywyd gwyllt.

Dywedodd y Rhingyll Matthew Langley o’r Tîm Troseddau Gwledig, “Mae Ymgyrch Seabird yn fenter sy’n cael ei chynnal rhwng yr heddlu ac asiantaethau partner ledled Cymru. Nod Ymgyrch Seabird yw gorfodi, ac ymgysylltu â’r cyhoedd a’u haddysgu er mwyn sicrhau eu bod nhw’n mwynhau ein harfordir hardd mewn modd diogel a chyfrifol. Y llynedd, gwelsom gynnydd mawr yn nifer y troseddau aflonyddu, a hynny’n bennaf oherwydd morfarch enwog a ddaeth ar ei wyliau i Ddinbych-y-pysgod! Mae’n bwysig i’r cyhoedd fod yn ymwybodol hefyd y gallant fod yn cyflawni troseddau o dan y Ddeddf Bywyd Gwyllt a Chefn Gwlad drwy darfu ar fywyd gwyllt.”

Os ydych chi allan yn crwydro’r arfordir, gofynnwn ichi gofio bod unrhyw weithgarwch yn medru aflonyddu ar fywyd gwyllt os nad yw’n cael ei gynnal mewn modd cyfrifol a diogel. Er mwyn lleihau aflonyddu ar fywyd gwyllt ar y dŵr, cynghorwn y canlynol:

• Cadwch draw: Cadwch bellter diogel (100 medr o leiaf) i ffwrdd wrth y creigiau, adar môr sy’n rafftio a mamaliaid morol, gan roi gofod i’r anifeiliaid symud i ffwrdd oddi wrthych.
• Cyflymder ‘dim deffro’: Dylai llongau modur a badau dŵr personol deithio ar gyflymder ‘dim deffro’ o fewn 300 medr o’r creigiau neu’r lan.
• Osgowch fannau caeedig: Dylai pob llong fodur a rhai heb fodur osgoi mynd mewn i ogofau a theithio drwy fynedfeydd bwaog pan mae adar môr sy’n bridio neu forloi sy’n gorffwys yn bresennol.
• Byddwch yn wyliadwrus: Os yw ymddygiad anifail yn newid mewn ymateb i’ch presenoldeb, symudwch i ffwrdd yn gyflym a thawel.

Yn ogystal ag addysgu a chodi ymwybyddiaeth drwy sianeli cyfryngau cymdeithasol a’r cyfryngau lleol, byddwn yn gweithio gydag asiantaethau partner er mwyn cynnal “diwrnodau gweithredu” drwy gydol yr haf. Bydd y diwrnodau gweithredu hyn yn gweld swyddogion lifrog wrth safleoedd lansio ac o gwmpas arfordir Dyfed-Powys. Byddant yn ymweld â busnesau, yn ymgysylltu â’r cyhoedd ac yn eu haddysgu er mwyn codi ymwybyddiaeth o’r problemau y gall rhai gweithgareddau hamdden achos i i’n bywyd gwyllt arfordirol.

Felly os ydych chi’n ymweld â’n harfordir hardd yr haf hwn, mwynhewch eich hun, ond ystyriwch y bywyd gwyllt o’ch cwmpas. Medrwch ddarllen y wybodaeth ddiweddaraf am ein gwaith ni ac asiantaethau partner drwy ddilyn #YmgyrchSeabirdCymru ar gyfryngau cymdeithasol.