Cyhuddo dyn o lofruddio mam oedrannus ym Mhowys

Mae dyn 57 oed wedi’i gyhuddo o lofruddio ei fam oedrannus yn dilyn digwyddiad ger Aberhonddu nos Wener (26 Awst).

Arestiwyd John Anderson Griffiths yn lleoliad y digwyddiad ac fe’i cyhuddwyd nos Lun.

Y mae wedi’i gadw yn y ddalfa a bydd yn ymddangos yn Llys Ynadon Merthyr ddydd Mawrth 30 Awst 2022.

Galwyd swyddogion i eiddo yn ardal Llanfrynach tua 9.25 o’r gloch nos Wener.

Aed â Margaret Joyce Griffiths, a oedd yn 87 oed ac yn cael ei hadnabod yn lleol fel Joyce, i'r ysbyty mewn hofrennydd, ond yn drist, bu farw'r diwrnod canlynol.

Mae ei pherthnasau agosaf a gweddill y teulu’n cael eu cefnogi gan swyddogion arbenigol.

Datganiad gan y teulu:

"Roedd Margaret Joyce Griffiths yn fam, mam-gu, chwaer ac aelod ffyddlon a gweithgar o'r gymuned yr oedd pawb mor hoff ohoni."

"Mae'r digwyddiadau trasig diweddar wedi torri calonnau'r teulu ac yn sioc fawr iddynt."

“Gofynnwn am breifatrwydd yn ystod y cyfnod erchyll hwn.”