Prif Gwnstabl Heddlu-Dyfed Powys yn croesawu adroddiad archwiliad PEEL diweddaraf AHGTAEM

Mae Arolygiaeth Heddluoedd a Gwasanaethau Tân ac Achub Ei Mawrhydi (AHGTAEM) wedi cyhoeddi adroddiad sy’n dangos tystiolaeth o welliannau sylweddol ar draws nifer o feysydd gwaith allweddol yn Heddlu Dyfed-Powys.

Ym mis Mai y llynedd, cyflwynodd yr arolygiaeth hefyd achos pryder carlam i’r heddlu yn ymwneud â safonau cofnodi troseddau, ond ym mis Mehefin 2022 cadarnhawyd bod Heddlu Dyfed-Powys wedi gwneud cynnydd da, wedi gwella ym mron pob agwedd ar gofnodi troseddau a bod yr achos pryder wedi ei ddileu.

Pan ddechreuodd y Prif Gwnstabl Dr Richard Lewis yn ei swydd ym mis Rhagfyr y llynedd, ymrwymodd i sicrhau y byddai'r heddlu’n darparu gwasanaeth i'r safon y byddai'r gweithlu ei eisiau ar gyfer eu hanwyliaid pe bai ei angen arnynt byth.

Ac mae adroddiad heddiw yn galonogol, gyda gwelliannau wedi’u nodi drwy gynydd mewn graddau mewn pedwar maes asesu.

Dywedodd y Prif Gwnstabl Dr Richard Lewis: “Does neb yn hoffi clywed y dylen nhw fod yn gwneud yn well, yn enwedig sefydliad sydd â’r prif swyddogaeth o ddiogelu’r rhai sydd ein hangen ni fwyaf.

“Rwy'n falch iawn o ddweud bod yr achos pryder wedi'i ddileu wedi i ni allu dangos tystiolaeth o welliannau sylweddol ac mewn amser byr.

“Ac mae cyhoeddi’r adroddiad llawnach hwn heddiw yn galonogol, gyda gwelliannau wedi’u nodi mewn pedwar maes asesu sef – gwasanaeth dioddefwyr, cywirdeb data trosedd, ymchwilio i droseddau, a rheoli troseddwyr. Mae hyn yn nodi gwelliant sylweddol yn y gwasanaeth rydym ni’n eu ddarparu.

“Rydym bellach yn monitro ein perfformiad yn ddyddiol, yn wythnosol ac yn fisol ac rydym wedi bod yn gwneud hyn ers sawl mis. Mae hyn yn ein gosod ar drywydd cadarnhaol a adlewyrchir yn adroddiad heddiw.

“Ein hymgais ni yn Heddlu Dyfed-Powys yw gwella’n barhaus, bod yn well heddiw nag yr oeddem ddoe, ac yn well yfory na heddiw.

“Mae gweithio fel hyn gyda meddylfryd o wella parhaus yn ddull cynaliadwy a synhwyrol ac mae eisoes wedi dwyn ffrwyth sylweddol.”

Un o’r meysydd y mae’n falch o’r gwelliannau gweithredol a wnaed yn Heddlu Dyfed-Powys yw stopio a chwilio. Drwy osod gweledigaeth i wella’n barhaus, yn hytrach na gosod targedau mympwyol, mae’r heddlu wedi gweld cynnydd o 71% o ran stopio a chwilio yn y chwe mis diwethaf, o’i gymharu â niferoedd y llynedd – a chanlyniad hynny yw gwaredu ein strydoedd o fwy o gyffuriau ac arfau er mwyn cadw’n plant yn ddiogel.

Ychwanegodd Dr Lewis: “Fodd bynnag, dydyn ni ddim yn hunanfodlon ac ni fyddwn yn stopio i ddathlu’r gwelliannau sydd wedi’u cynnwys yn yr adroddiad hwn.

“Ond yn lle hynny byddwn yn canolbwyntio ar ein hawydd i wella ymhellach o fewn y meysydd a nodir gan yr arolygiaeth a’r adborth hollbwysig gan ein cymunedau, sydd yr un mor werthfawr, os nad yn fwy felly nag un yr arolygiaeth.

“Hoffwn ddiolch i’r Comisiynydd, Dafydd Llywelyn am ei gefnogaeth a gwaith caled ein staff, ein swyddogion a’n gwirfoddolwyr anhygoel yn Heddlu Dyfed-Powys sy’n gweithio’n ddiflino bob dydd. Eu gwaith hwy sydd wedi ei wireddu yn y gwelliannau hyn.

“Rwy’n eich annog i ddarllen yr adroddiad llawn i gael y manylion, ac mae llawer i’w wneud o hyd. Ond, fel y Prif Gwnstabl yma, rwy’n edrych ymlaen at weld Dyfed-Powys yn chwarae ei rhan lawn yn y gwaith o gynnal a chreu cymunedau cryf a gwydn yng Nghanolbarth a Gorllewin Cymru dros y blynyddoedd i ddod.”