Carcharu dyn am ymosodiad direswm a adawodd y dioddefydd yn yr ysbyty am ddeufis

Mae dyn 21 oed a gerddodd i ffwrdd yn ddigynnwrf ar ôl taro dyn yn anymwybodol mewn ymosodiad direswm, a welodd ei ddioddefydd yn treulio deufis yn yr ysbyty, wedi’i garcharu am 4 blynedd a 10 mis.

Esgusodd Christian Hart o Heol Tregoning, Llanelli, baffio gyda’i ddioddefydd ar Heol yr Orsaf yn y dref cyn ei daro deirgwaith. Syrthiodd y dyn am yn ôl a tharo ei ben ar y llawr.  

Yn hytrach na galw am gymorth, cerddodd Hart a’i ffrindiau i ffwrdd, gan adael ei ddioddefydd yn anymwybodol ar y llawr.

Seiniwyd y larwm ac aed â’r dioddefydd i’r ysbyty lle’r oedd angen llawfeddygaeth arno ar ôl dioddef gwaedu difrifol ar ei ymennydd.

Dywedodd y Ditectif Gwnstabl Jack Harris, a ymchwiliodd i’r ymosodiad, y byddai’n rhaid i’r dioddefydd ddioddef effeithiau’r ymosodiad am flynyddoedd lawer, er ei fod wedi’i ryddhau o’r ysbyty.

Ychwanegodd y Ditectif Gwnstabl Harris: “Cipiwyd yr ymosodiad ar deledu cylch cyfyng. Yr ydych yn gweld yn glir bod Hart yn mynd at y dioddefydd, yn esgus paffio ag ef, ac yna’n ei daro deirgwaith.

“Mae’r dioddefydd yn syrthio, yn taro ei ben ar y concrit, ac yn gorwedd yno tra bod Hart yn cerdded i ffwrdd.”

Ymddangosodd Hart yn Llys y Goron Abertawe i gael ei ddedfrydu ddydd Mawrth 18 Ionawr ar ôl pledio’n euog i niwed corfforol difrifol â bwriad mewn gwrandawiad blaenorol.  

“Roedd hwn yn ymosodiad difrifol, a adawodd y dioddefydd ag anafiadau difrifol yr oedd yn ffodus i wella ohonynt.

“Aeth llawer o waith heddlu, a gafodd ei gynorthwyo’n fawr gan deledu cylch cyfyng da, i mewn i wneud achos mor gryf fel nad oedd fawr o ddewis gan Hart ond pledio’n euog.”