Carcharu dyn ar ôl ei ganfod mewn ffatri ganabis â gwerth £232,000 o blanhigion

Mae dyn wedi cael ei garcharu am ddwy flynedd wedi iddo gael ei ganfod mewn tŷ wedi'i  droi'n ffatri ganabis soffistigedig a oedd yn cynnwys 249 o blanhigion.

Cafwyd hyd i Elton Hazizi, 25 oed, sydd heb gartref sefydlog, y tu mewn i'r eiddo yn Highmead Avenue, Llanelli, pan weithredodd yr heddlu warant yno ar 13 Rhagfyr 2021.

Wedi'i arestio yn y lleoliad lle y daeth swyddogion o hyd i blanhigion â gwerth posibl o £232,400 ar y stryd, ceisiodd y gwladolyn Albaniaidd honni ei fod wedi'i orfodi i fod yno.

Fodd bynnag, dangosodd gwaith manwl gan swyddogion o Dîm Plismona Achosion Difrifol Sir Gaerfyrddin ac Uned Cyfathrebu Digidol a Seiberdroseddu Heddlu Dyfed-Powys nad oedd hyn yn wir, a'i fod  yn gysylltiedig â  grŵp troseddu trefnedig sy'n gysylltiedig â thrin a dosbarthu canabis.

Meddai’r uwch ymchwilydd, y Ditectif Arolygydd Rhys Jones, am y cyrch: "Roedd pob ystafell yn yr eiddo wedi cael ei throi'n ffatri ganabis broffesiynol a soffistigedig.

"Roedd 250 o blanhigion aeddfed o ansawdd uchel yn y tŷ, felly roedd hyn yn ymyrraeth gynnar dda ar y grŵp troseddu trefnedig yn dilyn gwaith rhagorol gan swyddogion i nodi a datblygu'r gudd-wybodaeth, a gan y Tîm Plismona Achosion Difrifol, a arweiniodd at ganlyniad yn  dilyn adennill llawer iawn o ganabis. 

"Honnodd Hazizi i ddechrau ei fod wedi’i orfodi i weithio yn y ffatri. Fodd bynnag, adenillwyd tystiolaeth ffôn symudol i’r gwrthwyneb gan ein hymchwilwyr a’r Uned Cyfathrebu Digidol a Seiberdroseddu.

Yn seiliedig ar hyn, plediodd Hazizi yn euog ac fe'i dedfrydwyd i ddwy flynedd o garchar. 

"Roedd hon yn ymyrraeth gynnar ardderchog ar  ffatri ganabis a oedd yn gysylltiedig â thestunau o ardal Gorllewin y Balcanau sy'n cael effaith fawr yn lleol ac yn genedlaethol. "

Cafodd Hazizi ei ddedfrydu yn Llys y Goron Abertawe Ddydd Mawrth 1 Chwefror.