Gorffennwch yr alwad! Modurwyr yn cael eu hannog i roi’r ffôn i lawr wrth yrru

Yr wythnos hon, mae Ymgyrch Defnyddio Ffôn Symudol wrth Yrru Cyngor Cenedlaethol Prif Swyddogion yr Heddlu yn cychwyn.

Bydd swyddogion o’r pedwar heddlu yng Nghymru a GanBwyll yn gweithio gyda phartneriaid ledled Cymru i addysgu defnyddwyr y ffordd am beryglon defnyddio eich ffôn symudol wrth yrru ac annog y lleiafrif sy'n dewis perygl dros ddiogelwch i wneud y dewis diogel.

Mae Adroddiad RAC ar Foduro wedi adrodd mai defnyddio ffonau symudol wrth yrru fu'r prif bryder i fodurwyr yn ystod y blynyddoedd diwethaf.

Nid yw’n syndod pan fydd ymchwil yn dangos bod gan fodurwyr sy'n dewis defnyddio eu ffôn symudol wrth yrru ddisgyblaeth lôn is ac yn cymryd mwy o amser i ymateb i beryglon, gan beryglu diogelwch holl ddefnyddwyr y ffordd.

Mae ymchwil wedi dangos, os ydych yn defnyddio ffôn symudol wrth yrru, eich bod 4 gwaith yn fwy tebygol o gael gwrthdrawiad a bod eich amser ymateb 2 waith yn arafach os byddwch yn anfon neges destun tra’n gyrru nag os ydych yn gyrru o dan ddylanwad alcohol; sy'n cynyddu i 3 gwaith yn arafach os ydych yn defnyddio ffôn â llaw.

Rydym yn gofyn i bob gyrrwr wneud diogelwch eu dewis cyntaf wrth yrru, ac ymwrthod â'r demtasiwn i edrych ar y ffôn symudol a'i ddefnyddio ar gyfer galwadau, negeseuon testun, rhestri chwarae cerddoriaeth, cyfryngau cymdeithasol, system llywio â lloeren neu unrhyw apiau eraill sy’n tynnu’ch sylw.

Fel y mae gwisgo gwregys ar ddechrau taith yn ail natur, beth am ddiffodd eich ffôn symudol ar ddechrau pob taith? Neu osod eich ffôn symudol mewn pwrs atal signal neu allan o’ch cyrraedd mewn blwch menig? Medrwch hyd yn oed trefnu bod eich ffôn symudol yn anfon neges at unrhyw un sy’n eich galw neu’n anfon neges destun atoch yn dweud wrthynt eich bod chi’n gyrru ac y byddwch chi’n cysylltu â nhw pan fyddwch chi wedi cyrraedd pen eich taith.

Dywedodd yr Uwch-arolygydd Clark Jones-John: “Nid yw gyrru a defnyddio ffôn symudol yn cymysgu. Mae’n beryglus ac fe allai trychineb ddigwydd.

Wrth yrru, dim ond ar y ffordd a'n hamgylchedd gyrru y dylem ganolbwyntio. Drwy roi ein ffonau symudol o'r neilltu drwy gydol taith byddwn yn chwarae ein rhan i gadw ein ffyrdd yn ddiogel.”

Ein nod yw gwneud ffyrdd Cymru yn fwy diogel i bawb, a thrwy addysgu defnyddwyr y ffordd am beryglon defnyddio ffôn symudol wrth yrru ac annog mwy o bobl i feddwl - A yw'r alwad neu'r neges destun honno'n wirioneddol bwysig? - gobeithiwn y bydd mwy o bobl yn gwneud y dewis diogel.

Nid yw’n cymryd un o’n swyddogion i ddal y rhai sy’n defnyddio’u ffonau symudol wrth yr olwyn. Medrwch lanlwytho tystiolaeth, megis darnau ffilm a recordiwyd ar gamera cerbyd, camerâu math GoPro, neu ffonau symudol, a’i hanfon at y rhan fwyaf o wasanaethau heddlu’r diwrnodau hyn.  

Mae hyn yn golygu y gallai unrhyw un fod yn cipio tystiolaeth o droseddu y gellid ei defnyddio i erlyn gyrrwr sy’n defnyddio ffôn.  

Medrwch gefnogi ein hymgyrch ar gyfryngau cymdeithasol gan ddefnyddio’r hashnod #5Angheuol.