Swyddogion yn mynd uwchlaw a thu hwnt er mwyn achub carw

Aeth dau swyddog heddlu uwchlaw a thu hwnt i’w dyletswydd pan aethant i achub carw a oedd yn sownd mewn siglen raff ym Mhowys.

Galwodd aelod o’r cyhoedd Heddlu Dyfed-Powys i ddweud bod corn y carw wedi mynd yn sownd yn y rhaff ger y Trallwng tua 3.30 o’r gloch brynhawn ddydd Sul 23 Ionawr.

Er nad yw’r heddlu fel arfer yn ymdrin â galwadau o’r fath, roedd dau aelod o Uned Plismona’r Ffyrdd ym Mhowys, sef Cwnstabl  Marcus Wright a Chwnstabl Dave Wilkinson, yn yr ardal, a phenderfynodd y ddau fynd ati i ymchwilio.

“Gwelais yr alwad yn dod i fyny ar y system, a’i bod wedi’i chyfeirio i’r RSPCA,” meddai Cwnstabl Wilkinson.

“Ond fel rhai sy’n ddwl am anifeiliaid, awgrymais wrth Marcus ein bod ni’n mynd i weld pa un ai a oedd modd inni helpu’r anifail a’i atal rhag dioddef."

Gan feddu ar siswrn bach yn unig, aeth y ddau i leoliad y digwyddiad, ger Castell Powys, lle gwelsant y carw trallodus. Yr oedd yn anadlu’n drwm iawn ac roedd ewyn yn dod allan o’i geg. 

Wrth iddo geisio rhedeg i ffwrdd, roedd yn cael ei godi gan y rhaff.

Methodd ymgais cychwynnol y pâr i geisio cael gafael ar y siglen raff gan fod y carw dal mewn panig, ac er eu pendantrwydd i ryddhau’r creadur, roedd yn rhaid i’r swyddogion fod yn ofalus gan fod cyrn miniog y carw mor agos i’r man lle’r oedd angen iddynt weithio.

Pan oedd y carw wedi blino rhywfaint, ceisiodd Cwnstabl Wright ei dawelu drwy grafu ei dalcen yn ysgafn tra bod Cwnstabl Wilkinson yn defnyddio’r siswrn o’u pecyn cymorth cyntaf i dorri’r rhaff.

“Roedd y carw druan yn hongian o’r gorn, ac mae’n rhaid ei fod wedi blino’n lân ac yn ofnus tu hwnt,” meddai Cwnstabl Wright.

“Yn ffodus, tawelodd yn eithaf buan, a olygai’n bod ni’n medru mynd ati i ddatod y rhaff o gwmpas ei gorn i’w ryddhau. O fewn 15 munud, roedd y carw’n rhydd, ond eisteddodd yno am ychydig er mwyn cael ei wynt yn ôl cyn rhedeg i ffwrdd.

“Fel rhai sy’n caru anifeiliaid, yr oedd yn braf gweld y carw, ac yn brofiad gwerth chweil i’r ddau ohonom.”  

Roedd y swyddogion yn falch iawn eu bod nhw’n medru helpu yn yr achos hwn, ond dymunant atgoffa’r cyhoedd bod asiantaethau fel yr RSPCA yno i gynorthwyo adeg digwyddiadau o’r fath.