HDPP yn Sioe Frenhinol 2022

GOFALU am ein cymdogion, ein treftadaeth leol, ac aros yn ddiogel ar-lein ac all-lein fydd ffocws stondin Heddlu Dyfed-Powys yn y Sioe Frenhinol wythnos nesaf.

Bydd presenoldeb yr heddlu yn nigwyddiad 2022 yn canolbwyntio ar roi’r wybodaeth sydd ei hangen arnynt i’r cyhoedd i sylwi pan fod rhywbeth o’i le, ac yn hollbwysig, beth i’w wneud nesaf.

O adnabod arwyddion cam-drin domestig i adnabod pan mae anwylyn wedi dioddef twyll, mae cymorth y cyhoedd yn hollbwysig ar gyfer atal y cam-drin hwn.

Bydd swyddogion a staff wrth law i’ch cynghori am yr hyn i gadw llygad allan amdano, a’r ffyrdd gorau o rannu pryderon neu adrodd am drosedd.

Bydd ein tîm Troseddau Gwledig yn rhannu technegau ar gyfer gwarchod yn erbyn lladradau olew gwresogi, beiciau cwad, metel sgrap a thrawsnewidyddion catalytig, tra bydd ditectifs seiber yn eich cynghori ynghylch sut i aros yn ddiogel wrth gynnal busnes ar-lein.

Bydd yr Arolygydd Reuben Palin yn sôn am ei waith gyda heddluoedd eraill Cymru ar gyfer mynd i’r afael â throseddau treftadaeth, a chewch ddysgu am Ymgyrch Seabird, sef ymgyrch amlasiantaeth sy’n annog pobl i ymddwyn yn gyfrifol o gwmpas bywyd morol.

Bydd Swyddfa Comisiynydd yr Heddlu a Throseddu’n gwrando ar farn ymwelwyr am y Cynllun Heddlu a Throseddu ac am sut y gellir gwella’r gymuned blismona.

Cewch wybod hefyd am y cyfleoedd gwerth chweil sydd ar gael fel gwirfoddolwr neu Lysgennad Ifanc.

Ar gyfer y rhai sy’n chwilfrydig am yrfa gyda’r heddlu, bydd ein tîm recriwtio’n cynnal sesiynau un-i-un, a bydd rhai o’n prentisiaid busnes hefyd yn sôn am eu profiad o ymuno â HDP.

Drwy gydol yr wythnos, gall teuluoedd gael cyngor ynghylch sut i aros yn ddiogel a chael hwyl yr un pryd.

Dysgwch sut i ddysgu’ch plentyn sut i ofyn am gymorth yn ddiogel os yw’n cael ei wahanu wrthych mewn torf, a chasglwch fandiau garddwrn adnabod i’ch teulu.

Gall ymchwilwyr iau chwilio am gliwiau yn ein lleoliad trosedd arbennig, gwisgo i fyny a chael eu hwynebau wedi’u paentio hefyd.

Bydd carwyr moduron o bob oed yn mwynhau sgwrsio â’r Rhingyll Ian Price o GanBwyll am ein fflyd, o feiciau modur i’n cerbydau trydan diweddaraf, a bydd Cwnstabl Hefyn Jones yn cyflwyno ei gyfaill pedwar coes.

Cewch hyd inni ar stondin E398, gyferbyn â’r prif safle. Dewch i ddweud helo!