Carcharu dyn a ffilmiodd drais ar ffôn ei ddioddefydd am 10 o flynyddoedd

Mae dyn a ffilmiodd ei hun yn treisio dynes ar ffôn ei ddioddefydd wedi ei ddedfrydu i 10 o flynyddoedd o garchar.

Ymosododd Cameron Hassan, 31 oed, sydd heb gartref sefydlog, ar y ddynes, gan ei threisio wrth iddi gysgu yn Rhydaman ar 21 Awst 2021.

Newidiodd Hassan, a oedd hanner ffordd drwy ei dreial yn Llys y Goron Abertawe ar ôl gwadu ei fod wedi gwneud unrhyw beth o’i le, ei ble i euog ar ôl i’r rheithgor weld fideo o’r ymosodiad.

Yr oedd yn ôl o flaen Llys y Goron Abertawe heddiw pan gafodd ei ddedfrydu i 10 o flynyddoedd o garchar.

Dywedodd yr Uwch Swyddog Ymchwilio, y Ditectif Arolygydd Melanie Havard, bod y dioddefydd wedi dangos cryfder a phenderfynoldeb aruthrol drwy gydol yr ymchwiliad a'r achos llys.

“Mae’n rhaid imi ganmol ei dewrder aruthrol yn dod ymlaen, a’r cryfder y mae wedi dangos drwy gydol yr ymchwiliad,” meddai. 

“Gwerthfawrogwn nad yw hyn yn hawdd i unrhyw un wneud, ond mae’r dioddefydd wedi mynegi ei diolch i swyddog yr achos am ei chefnogaeth a’r empathi a ddangoswyd drwy gydol y broses hon.

“Gobeithiwn fod yr achos hwn yn dangos bod Heddlu Dyfed-Powys yn gweithredu ar honiadau difrifol megis trais ac ymosodiadau rhywiol, a bod swyddogion yn gweithio’n ddiflino er mwyn sicrhau cyfiawnder i ddioddefwyr.

“Os ydych chi’n dioddef oherwydd cam-drin tebyg, cysylltwch â’r heddlu. Os fyddai’n well gennych siarad â rhywun yn gyfrinachol, mae Llwybrau Newydd yn elusen annibynnol a fydd yn eich cefnogi drwy bob cam o’r ymchwiliad.”

Gellir cysylltu â Llwybrau Newydd drwy alw 01685 379 310 neu drwy anfon e-bost at [email protected].

Medrwch adrodd amdano wrth Heddlu Dyfed-Powys ar-lein ar https://www.dyfed-powys.police.uk/cy-GB/cysylltu-a-ni/af/cysylltu-a-ni/, drwy anfon e-bost at [email protected], neu drwy alw 101.