Dedfrydu unigolyn ifanc yn ei arddegau am yrru’n beryglus drwy Hwlffordd

Mae gyrrwr 17 oed sydd eisoes wedi’i wahardd ac a yrrodd oddi wrth yr heddlu, gan arwain at ei ymlid trwy dref brysur, wedi cael dedfryd ohiriedig a’i wahardd rhag gyrru am dair blynedd.

Cafodd Jerry Harty ei ddedfrydu yn Llys y Goron Abertawe ddydd Gwener, pan gafodd hefyd orchymyn i fynychu cynllun dargyfeiriol er mwyn gwneud gweithgaredd adsefydlu am 20 diwrnod mewn ymgais i’w gael i newid ei ffyrdd.

Roedd gyrru Harty mor beryglus - gyda chyflymder gormodol, gyrru ar ochr anghywir y ffordd, a theithio'r ffordd anghywir o amgylch cylchfan - fel bod yn rhaid i'r heddlu roi'r gorau i'w ymlid.

Fodd bynnag, gwrthododd swyddogion Heddlu Dyfed-Powys adael iddo ddianc.

Fe wnaethant barhau i batrolio’r ardal a siarad ag aelod o’r cyhoedd a oedd wedi gweld car yn cyfateb i ddisgrifiad car Harty yn troi i lawr tuag at Freystrop.

Dilynodd swyddogion y llwybr hwnnw a dod o hyd i Harty, sydd bellach yn 18 oed, o Faes Carafanau Pantyblawd, Parc Menter Abertawe, ger ei Peugeot 308 du, lle'r oedd wedi ceisio cael gwaraed ar y car a'i allweddi.

Meddai PS Paul Owen-Williams : “Mae Harry’n ifanc, yn ddibrofiad ac roedd eisoes wedi’i wahardd rhag gyrru.

“Roedd ei yrru ar y diwrnod hwnnw yn beryglus a gallai mor hawdd fod wedi arwain at wrthdrawiad difrifol.

“Roedd yn meddwl y gallai ddianc, a gwadodd unrhyw ran yn y digwyddiad, gan geisio beio rhywun arall am ei weithredoedd, gan bledio’n ddieuog mewn gwrandawiadau cynharach.

“Ond rwy’n falch bod ein swyddogion, trwy ymdrechion dyfal a gwaith heddlu da, wedi gallu cael y dystiolaeth angenrheidiol i wneud iddo newid ei ble i euog.”

Dechreuodd y digwyddiad, ar Hydref 9, 2021, pan geisiodd swyddogion dynnu car Harty drosodd ychydig cyn cylchfan Sgwâr Salutation yn Hwlffordd.

Wnaeth Harty, a oedd wedi’i wahardd rhag gyrru o’r blaen yn 2018 ac nad oedd erioed wedi dal trwydded yrru lawn ddim stopio. Daliodd i yrru, mewn modd oedd yn cydymffurfio â rheolau'r ffordd fawr i ddechrau, at y gylchfan gan droi i Freemans Way.

Gyda’r heddlu’n dal ar ei ôl, gyda’u goleuadau a’u seirenau ymlaen, symudodd Harty i ochr arall y ffordd a dechrau goddiweddyd cerbydau ar gyflymder, gan orfodi ei ffordd drwy’r traffig tuag at Gylchfan Pont Fadlen.

Yna fe gymrodd yr ail allanfa i'r A4076 tuag at Johnston pan oedd y goleuadau ar goch gan fynd y ffordd anghywir o amgylch y bolard 'cadwch i'r chwith' wrth y prif oleuadau traffig, wrth ymyl y tro i Old Hakin Road, gan orfodi aelod o'r cyhoedd i frecio’n sydyn.

Yna aeth yn ôl i ochr gywir y ffordd a pharhau i yrru ar gyflymder ar yr A4076 i gyfeiriad Johnston. Cafodd ei weld yn gwneud 60mya mewn parth 30mya.

Daliodd Harty i oddiweddyd cerbydau a gorfodi ei ffordd trwy draffig ac yna cafodd ei weld yn gwneud 90mya wrth i'w gar gyrraedd y parth 50mya i gyfeiriad Johnston.

Wrth iddo ddod at y gylchfan yn Johnston, aeth Harty’r ffordd anghywir o’i chwmpas, unwaith eto, gan orfodi pobl i stopio a symud i osgoi cael eu taro.

Yn sgil y risg i aelodau’r cyhoedd gan y gyrrwr, rhoddodd y swyddogion y gorau i’r ymlid.

Unwaith y daeth swyddogion o hyd iddo, cafodd ei arestio a'i gyhuddo'n ddiweddarach o beidio â stopio, gyrru tra’r oedd wedi ei wahardd, gyrru heb yswiriant, gyrru'n beryglus a gyrru heb fod yn unol â thrwydded.

Ar ôl pledio’n euog i’r troseddau hyn mewn gwrandawiad blaenorol fe’i dedfrydwyd ddydd Gwener gan dderbyn dedfryd o 27 wythnos o garchar, wedi’i gohirio am flwyddyn, gorchmynnwyd iddo wneud 150 awr o waith di-dâl, gwneud gweithgaredd adsefydlu am 20 diwrnod a chafodd ei wahardd rhag gyrru am dair blynedd.

Ychwanegodd PS Owen-Williams: “Rydym yn falch o’r ddedfryd a’n gobaith yw y bydd yn rhybudd i unrhyw un sy’n ystyried gyrru mewn ffordd mor ffôl a di-hid.

“Diolch i’r drefn nad oedd neb wedi eu hanafu’n ddifrifol y diwrnod hwnnw.”