Euogfarnu grŵp troseddu trefnedig o Fwa’r Tre Llai am ymgyrch gyffuriau fawr ym Mhowys

Mae aelodau giang cyffuriau o Fwa’r Tre Llai wedi’u heuogfarnu o ddod â gwerth cannoedd o filoedd o bunnoedd o heroin a chocên i mewn i Bowys.

Canfu Daniel Seyffert, 39 oed, o Stryd Fawr Llanandras a Lee Husbands, 22 oed, o Bowling Green Lane, Trefyclo, yn euog o gynllwynio i werthu cyffuriau dosbarth A a B yn dilyn prawf yn Llys y Goron Caernarfon ddydd Gwener.

Nid oedd y rheithgor yn medru dychwelyd dyfarniad ar drydydd diffynnydd, sef Lucy Lloyd, 34 oed, o Heyope, Trefyclo.

Canfu Martin John Gallagher, 35 oed, a Michael Power, 20 oed, o Fwa’r Tre Llai, y Trallwng, yn euog ar ddechrau’r prawf.  

Plediodd wyth arall - Patrick David Stokes, 33 oed, o Fwa’r Tre Llai, Tre’r Llai, y Trallwng; John Paul Power, 26 oed, o Fwa’r Tre Llai, y Trallwng; Sheldon Terrence Kay, 24 oed, o Heol yr Orsaf, Trefyclo; Kane Glyn Bastable, 24 oed, o Clarence Road, Wolverhampton; Kuldeep Sahota, 35 oed, o Broad Lanes, Wolverhampton; Gavin Andrew Tony Warley, 29 oed, o Fourth Avenue, Wolverhampton; Joshua Large, 23 oed, o Brook Close, Coven; a Kristian Rigby, 28 oed, o Rodfa Maesyfed, Trefyclo – yn euog mewn gwrandawiad cynharach.

Roedd yr ymgyrch llinellau cyffuriau’n cynnwys mynd â symiau mawr o gocên a heroin o ardal Wolverhampton i’r safle ym Mwa’r Tre Llai i rannu’r cyffuriau yn y Trallwng, y Drenewydd, Trefyclo a threfi eraill ym Mhowys dros sawl mis.

Wrth weithredu gwarant yn y safle teithwyr ym Mwa’r Tre Llai ddydd Llun 21 Mehefin 2021, datgelodd ymgyrch fawr gan Heddlu Dyfed-Powys, a oedd yn cynnwys 80 swyddog, swm sylweddol o gyffuriau.

Dywedodd y Ditectif Arolygydd Richard Lewis fod llawer o waith caled wedi mynd i mewn i’r ymchwiliad, gyda’i swyddogion yn llwyddo i brofi symudiadau’r grŵp troseddu trefnedig, a brofodd yn hollbwysig ar gyfer sicrhau erlyniad pellgyrhaeddol.  

“Yr ydym yn croesawu euogfarnu a dedfrydu pobl sydd wedi bod yn gysylltiedig â dod â chyffuriau i mewn i’n cymunedau,” meddai.

“Mae llawer o waith wedi mynd i mewn i brofi ehangder yr ymgyrch hon, felly hoffwn ddiolch i bawb a oedd yn gysylltiedig â sicrhau’r euogfarnau hyn.  

“Bydd cael gwared ar y grŵp troseddu trefnedig hwn yn cael effaith ehangach ar y gymuned na dileu’r bygythiad cyffuriau yn unig. Bydd y bygythiadau, ofn ac ymddygiad gwrthgymdeithasol sy’n gysylltiedig â’r math hwn o weithgarwch yn bellgyrhaeddol.

“Mae’r dedfrydau’n dangos nad yw’n werth gwerthu cyffuriau. Nid yn unig y byddwn yn ceisio’ch dwyn i gyfiawnder am y troseddau hyn, byddwn yn ceisio adennill unrhyw arian neu asedau yr ydych wedi elwa ohonynt o ganlyniad i’ch gweithgarwch troseddol.”

Dywedodd y Prif Arolygydd Jacqui Lovatt: “Effeithiodd y gweithgarwch cyffuriau ac ymddygiad gwrthgymdeithasol cysylltiedig yr unigolion hyn yn sylweddol ar gymuned Powys, gan gynnwys ansawdd bywyd preswylwyr a busnesau lleol.  

“Nid yn unig y bydd y canlyniad hwn yn cael effaith cadarnhaol ar y gymuned o ran dileu’r bygythiad a gyflwynir gan yr unigolion hyn, ond bydd hefyd yn anfon neges gref at unrhyw un sy’n gysylltiedig â chyflenwi cyffuriau ledled Powys na fydd yn cael ei oddef.

“Hoffwn sicrhau’r cyhoedd y byddwn yn parhau i weithredu ar bob pryder ynglŷn â defnyddio a chamddefnyddio cyffuriau.” 

Bydd dedfrydu’n digwydd rywbryd eto.