Wythnos o weithredu yn targedu troseddwyr ac yn addysgu cymunedau i adnabod yr arwyddion

Fe nodwyd Wythnos Dwysáu Ymdrechion i Daclo Llinellau Cyffuriau (7-13 Mawrth) gan Heddlu Dyfed-Powys drwy roi stop ar weithrediad cyffuriau newydd gan achub plentyn rhag cam-fanteisio posibl, ac addysgu 2,500 o bobl am linellau cyffuriau.

Cymerodd swyddogion ran mewn gweithrediadau ledled ardal yr heddlu i darfu ar y cyflenwad cyffuriau. Bu'r swyddogion hefyd yn addysgu pobl am linellau cyffuriau, o blant ysgol i berchnogion gwestai a pharciau gwyliau, sy’n aml yn cael eu hecsbloetio gan gangiau.

Yn Stryd y Deml, Llandrindod, cafodd dau ddyn – un lleol ac un o orllewin canolbarth Lloegr – eu harestio yn dilyn gwarant cyffuriau, gydag amheuaeth eu bod yn cuddio cyffuriau y tu mewn i’w cyrff.

Yn ddiweddarach cynhyrchodd un gyffuriau wedi’u lapio mewn cling ffilm oedd wedi’i guddio yn ei anws. Roedd yn cynnwys 84 dêl o heroin a chrac cocên.

Dywedodd y Ditectif Uwch-arolygydd Gareth Roberts: “Rydyn ni’n gweithio’n ddiflino ac yn ddi-baid, gyda’n partneriaid, i adnabod bygythiadau fel llinellau cyffuriau yn ein cymunedau.

“Mae’r rhaglenni ymgysylltu ac addysgu rydyn ni’n eu harwain gydag adnoddau arbenigol, ymroddedig yr heddlu, partneriaid a’r gymuned o dan ein strategaeth Troseddau Cyfundrefnol Difrifol (INTACT), yn ein galluogi i gael gwybodaeth gywir a dibynadwy.

“Pan fyddwn ni’n adnabod bygythiadau, megis llinell cyffuriau yn yr achos hwn, rydyn ni’n defnyddio adnoddau i darfu arnyn nhw cyn gynted â phosibl fel nad yw’r bygythiad yn gwreiddio, gan ddod yn ei sgil y trais, yr ecsbloetio a’r dioddefaint sy’n gysylltiedig ag ef i’n cymunedau – yn enwedig i’r rhai mwyaf bregus.

“Rydyn ni’n parhau â’n hymdrechion di-baid i amddiffyn ein cymunedau rhag niwed, a dyna pam, yn ystadegol, mae Dyfed-Powys yn parhau i fod yn un o’r mannau mwyaf diogel i fyw ynddo.”

Fel rhan o’r wythnos dwysáu ymdrechion, arestiwyd saith person am droseddau amrywiol yn ymwneud â chyffuriau. Atafaelwyd hefyd 100 rap o heroin a chrac cocên, yn ogystal â £2,500 mewn arian parod a thri ffôn symudol, a fydd yn cael eu harchwilio i weld a ydynt yn llinellau delio.

Honnodd un dyn ei fod yn dioddef camfanteisio ac yn gwerthu’r cyffuriau o dan orfodaeth a bygythiadau o drais gan Grŵp Troseddau Trefnedig.

Trefnwyd y gwaith rhagweithiol hwn a’i gyflwyno gan INTACT, rhaglen bartneriaeth amlasiantaeth sy’n mynd i’r afael â thrais difrifol a throseddau trefnedig yn Sir Gaerfyrddin, Ceredigion, Sir Benfro a Phowys.

Roedd y gwaith yn cynnwys y canlynol:

• Mynychodd 135 o bobl weminar am linellau cyffuriau a gydgyflwynwyd gan y Rhaglen INTACT a’r Uned Troseddau Cyfundrefnol Ranbarthol, Tarian.
• Derbyniodd 200 o staff a gwirfoddolwyr o asiantaethau partner fewnbwn personol gan Swyddogion Cymorth Cymunedol (PCSO) INTACT.
• Ymwelwyd â phum person agored i niwed sydd mewn perygl o gael eu twyllo neu eu hecsbloetio, a rhoddwyd cyngor diogelu iddynt ar linellu cyffuriau.
• Cynhaliwyd pedwar patrôl llinellau cyffuriau gan dimau plismona yn y gymdogaeth lleol, a fu’n cynnal trafodaethau gyda’r gymuned a siarad am arwyddion llinellau cyffuriau.
• Cynhaliwyd pum menter ‘Cwrdd â’r Stryd’ gan dimau plismona bro a gwasanaethau cymorth tai a chyffuriau ac alcohol lleol, mewn ardaloedd sydd â phroblem gyffuriau, er mwyn siarad am y perygl o linellau cyffuriau a chamddefnyddio sylweddau.
• Derbyniodd 80 o safleoedd trwyddedig fewnbwn am linellau cyffuriau a diogelu yn economi’r nos.
• Addysgwyd 25 o gadetiaid yr heddlu am linellau cyffuriau a gofynnwyd iddynt hyrwyddo sut i adnabod yr arwyddion.
• Cafwyd trafodaethau gyda 100 o bobl ifanc ‘mewn perygl’ fel rhan o grŵp ymyrryd ynglŷn â’r niwed sy’n gysylltiedig â llinellau cyffuriau.
• Addysgwyd 50 myfyriwr mewn coleg am linellau cyffuriau a dangoswyd y fideo ‘Running the Lines’ gan Fearless.
• Gwnaeth tua 1,500 o blant ysgol ymgysylltu â swyddogion heddlu cymunedol a chyrchwyd flog llinellau cyffuriau.
• Ymwelwyd â 50 llety Gwely a Brecwast, parciau carafanau a gwestai rhad a’u haddysgu am linellau cyffuriau, ecsbloetio a chogio.
• Addysgwyd pum cwmni tacsi am linellau cyffuriau a gofynnwyd iddynt gyflwyno gwybodaeth i’r heddlu pe baent yn gweld bygythiad.
• Addysgwyd 20 manwerthwr sy’n cynnig gwasanaethau ariannu ffonau symudol am linellau cyffuriau a ffonau dros dro.
• Rhoddwyd gwybodaeth i aelodau tri chyngor tref am linellau cyffuriau, ecsbloetio a chogio.

O'r rhai a arestiwyd yn ystod Wythnos Dwysáu Ymdrechion i Daclo Llinellau Cyffuriau, mae tri wedi’u rhyddhau dan fechnïaeth a phedwar wedi’u rhyddhau dan ymchwiliad.

Os ydych chi’n grŵp cymunedol neu’n bartner sydd â diddordeb mewn dysgu mwy am linellau cyffuriau, cysylltwch â thîm INTACT drwy e-bost: [email protected]