Carcharu gyrrwr am ddamwain ddifrifol a achosodd anafiadau a newidiodd fywyd

Dywedodd gyrrwr, a achosodd ddamwain ddifrifol gyda char oedd yn cael ei yrru gan ddynes feichiog, wrth swyddogion yr heddlu ar safle’r ddamwain ei fod wedi yfed 13 can o lager cryf y noson gynt.

Cyfaddefodd Rhodri Rees, 36 oed, o Landysul, iddo fod yn yfed tan oriau mân y bore cyn mynd y tu ôl i’r llyw ac achosi’r ddamwain ar ffordd yr A476 yn Llan-non, ger Llanelli, drwy oddiweddyd car arall ar droad am tua 7:40am ar 11 Rhagfyr, 2020.

Bu’n rhaid i ddiffoddwyr tân dorri’r ddau yrrwr yn rhydd o’u ceir yn dilyn y gwrthdrawiad difrifol.

Ni chafodd y babi ei niweidio yn y gwrthdrawiad, diolch byth, ond dioddefodd y fam nifer o anafiadau difrifol sydd wedi newid ei bywyd. Cafodd nifer o lawdriniaethau i atgyweirio’r niwed a wnaed, ac nid oedd yn gallu cerdded am flwyddyn. Mae’n dal i ddioddef effeithiau’r ddamwain hyd heddiw.

Dywedodd y Rhingyll Nicholas Brookes o Heddlu Dyfed-Powys: “Pan siaradodd ein swyddogion â Rees ar safle’r ddamwain, dywedodd wrthyn nhw ei fod wedi yfed 13 can o Stella Artois a’i fod wedi mynd i’r gwely wedi hanner nos.

“Methodd brawf anadl yn y fan a’r lle ac fe gafodd ei arestio ar amheuaeth o yfed a gyrru cyn cael caniatâd i fynd i’r ysbyty am driniaeth.”

Y diwrnod canlynol, cafodd ei gyfweld yng Ngorsaf Heddlu Caerfyrddin lle dywedodd wrth swyddogion ei fod wedi yfed wyth neu naw can o Foster’s cyn mynd i’r gwely tua 2am, cyn codi tua 6:45am a chychwyn ar ei daith.

Cymerwyd sampl gwaed ychydig cyn 1pm ar 11 Rhagfyr, a oedd yn dangos bod gan Rees 39mg o alcohol am bob 100ml o waed – y terfyn cyfreithiol yw 80. Daeth arbenigwr alcohol gwaed i’r casgliad na fyddai lefel yr alcohol wedi bod yn llai na 113mg ar adeg y gwrthdrawiad, ac roedd yn fwy tebygol o fod yn 129mg.

 Ychwanegodd PS Brookes: “Roedd hwn yn achos difrifol a allai fod wedi bod gymaint yn waeth.

“Cyfaddefodd Rees iddo yfed cryn dipyn o alcohol a chael fawr o gwsg cyn mynd y tu ôl i’r llyw. Roedd yn lwcus na chafodd neb eu lladd.

“Hoffwn ganmol y swyddog yn yr achos hwn, sef PC Benjamin Stevenson, a gynhaliodd ymchwiliad trylwyr a manwl i’r drosedd o achosi anaf difrifol drwy yrru’n beryglus.”

Ddydd Mawrth, 17 Mai, ymddangosodd Rees gerbron Llys y Goron Abertawe, ar ôl pledio’n euog mewn gwrandawiad blaenorol. Fe’i dedfrydwyd i 18 mis o garchar.

Cafodd hefyd ei wahardd rhag gyrru am 3 blynedd a 9 mis, a bydd rhaid iddo sefyll prawf estynedig i adennill ei drwydded.