Carcharu gyrrwr peryglus am erlid a’i gwelodd yn taro tri cherbyd heddlu

Mae gyrrwr a yrrodd i ffwrdd o’r heddlu, gan daro eu car, cyn arwain erlid 20 milltir a ddaeth i ben pan bigwyd ei gar ac roedd ei olwynion blaen i lawr i’w camogau, wedi ei garcharu am 14 mis, ac mae ei gar wedi’i gymryd oddi wrtho.

Tynnodd swyddogion gar BMW 1 Series du Jamie Adams drosodd ar y gerbytffordd tua’r dwyrain ar yr A477 rhwng y troad ar gyfer Stepaside ac Amroth ychydig cyn 2 o’r gloch fore ddydd Mawrth 12 Ebrill 2022.  

Ufuddhaodd Adams, 31 oed, o Deras Kimberley, Georgetown, Tredegar, i gychwyn, ond pan siaradodd swyddogion ag ef drwy ei ddrws agored a’i holi am ei ddefnydd o gyffuriau oherwydd y gwynt canabis a oedd yn dod o’i gar, taniodd Adams yr injan a gyrru i ffwrdd. Bu bron iddo lusgo swyddog gydag ef, a bwrodd gar heddlu cyn gyrru i ffwrdd ar gyflymder.

Dilynodd swyddogion, gan erlid Adams, a aeth i fyny i gyflymder o 100mya ar yr A477 cyn troi i ffwrdd a gyrru ar hyd lonydd gwledig yn ardaloedd Llanteg, Rhos-goch a Phentywyn, am 20 milltir.

Gwnaed ymgais aflwyddiannus i stopio ei gar. Gyrrodd Adams am yn ôl a tharo car heddlu cyn gyrru i ffwrdd.

Ceisiodd yrru i’r dwyrain yn y diwedd, pan lwyddodd swyddogion i osod pigau ar y ffordd yn ardal Sanclêr isaf.

Parhaodd Adams i oryrru ar ôl cael ei bigo, gan yrru ar gyflymder o 70mya mewn ardal 30mya.

Ceisiodd swyddog ar y ffordd o’i flaen arafu Adams a’i stopio, ond gyrrodd i mewn i’r car a gyrru i ffwrdd eto.

Â’i olwynion blaen yn dadchwythu, daliodd Adams ati i oryrru, gan ymuno â’r A40 a theithio i gyfeiriad Caerfyrddin.

 swyddogion yn ei ddilyn, trodd Adams i mewn i Fancyfelin, lle ddaeth ei deiar blaen cyntaf i ffwrdd. Ni rwystrodd hyn Adams, a daliodd ati i yrru drwy’r pentref, lle y collodd ei ail deiar blaen.

Lawr i’r camogau, aeth Adams yn ei flaen, gan ailymuno â’r A40 a theithio i’r dwyrain.

Bryd hynny, cynlluniodd swyddogion dacteg stopio, a weithredwyd ychydig heibio i’r orsaf betrol ar Heol Dinbych-y-pysgod. Arestiwyd Adams am yrru’n beryglus, ymysg cyhuddiadau eraill.