Pum mlynedd o garchar i leidr â chyllell

Mae dyn a wnaeth ddwyn oddi ar fenyw a’i bygwth â chyllell wedi dechrau dedfryd o bum mlynedd o garchar, a hynny fis yn unig wedi’r ymosodiad.

Cyfaddefodd Kieran Steven Brumby ei fod wedi dal cyllell i wddf y fenyw a mynnu’r £160 yr oedd hi’n ei dynnu o beiriant arian parod yn Asda yn Noc Penfro am tua 7:45pm ar 15 Ebrill.

O fewn awr, llwyddodd Heddlu Dyfed-Powys i ddod o hyd i Brumby yn ei gartref yn Stryd y Dŵr, Doc Penfro. 

Er i’r digwyddiad gael ei ddal ar CCTV, gwadodd Brumby mai ef oedd y drwgweithredwr yn ystod ymchwiliad yr heddlu.

Fodd bynnag, yn Llys y Goron Abertawe ddydd Llun, 16 Mai, plediodd yn euog o ladrata, bod â chyllell yn ei feddiant a bod â 0.9 gram o gocên yn ei feddiant.

Dywedodd DI Owen Thomas: “Mae hwn yn ganlyniad cadarnhaol, gyda Brumby’n cael ei arestio’n fuan ar ôl y drosedd.

“Mae wedi bod ar remand ers hynny ac mae bellach yn dechrau dedfryd o bum mlynedd o garchar dim ond mis yn ddiweddarach. Rwy’n gobeithio y bydd hynny’n cynnig rhywfaint o gysur a sicrwydd i’r dioddefwr.”

Clywodd y llys sut roedd y fenyw wedi stopio i gael arian parod ar ei ffordd i gwrdd â ffrindiau yn Hwlffordd pan ddaliodd Brumby y gyllell i’w gwddf a dweud ‘rho’r arian i fi’.

Mewn datganiad effaith ar ddioddefwr a ddarllenwyd i’r llys, dywedodd y fenyw, a allai deimlo’r gyllell yn cyffwrdd â’i gwddf, ei bod yn dioddef o nosweithiau di-gwsg, crychguriadau’r galon a hunllefau.

“Rwy’n teimlo’n isel ac yn bryderus ac yn teimlo’n gyson fel bod rhywun y tu ôl i mi,” meddai.

“Rwy’n edrych dros fy ysgwydd bob munud. Os bydda i’n gadael y tŷ, rwy’n teimlo’r panic yn dod.”

Rhoddodd y Barnwr, Ei Anrhydedd Geraint Walters, ddedfryd o bum mlynedd am y lladrad, gyda dedfryd o 12 mis am fod ym meddiant cyllell a dedfryd o fis am fod ym meddiant cocên. Bydd y cyfan yn rhedeg ar yr un pryd.