Annog rhieni a gofalwyr i siarad am ddiogelwch ar-lein

Mae Heddlu Dyfed-Powys yn annog rhieni a gofalwyr i siarad â phlant a phobl ifanc am gadw’n ddiogel ar-lein.

Mae’r heddlu’n annog oedolion i gael sgyrsiau am beryglon ‘gor-rannu’ – rhannu gormod o wybodaeth amdanyn nhw’u hunain, neu ffotograffau neu fideos ohonyn nhw’u hunain – a’r hyn y gallan nhw ei wneud os bydd rhywun yn gofyn am neu’n anfon cynnwys rhywiol ei natur.

Eglurodd y Ditectif Arolygydd Phil Kite:

“Mae pobl ifanc yn eu harddegau’n rhannu lluniau a fideos preifat heb ddeall y gallen nhw gael eu defnyddio yn eu herbyn, neu eu rhannu ag eraill.

 “Yn anffodus, rydyn ni wedi gweld achosion lle mae plant a phobl ifanc yn cael niwed am nad oedden nhw’n gwybod ble i droi am help.

"Rydyn ni yma i helpu a byddwn yn trin pob dioddefwr gyda phob gostyngeiddrwydd, sensitifrwydd a chyfrinachedd."

Mae ein tîm o Swyddogion Heddlu Ysgolion yn cyflwyno gwersi am ddiogelwch ar-lein ar draws ardal Dyfed-Powys, fel rhan o Raglen Ysgolion Heddluoedd Cymru. Nod yr heddlu yw sicrhau bod gan bobl ifanc dîm o oedolion y maen nhw’n ymddiried ynddyn nhw i drafod eu pryderon â nhw.

 DI Kite ymlaen:

“Mae troseddwyr yn targedu ac yn dod yn ffrindiau â’u dioddefwyr, ac unwaith y bydd ganddyn nhw ddelweddau neu fideos preifat neu rywiol eu natur, maen nhw’n ceisio blacmelio’r dioddefwyr i anfon arian neu fwy o luniau. Gelwir hyn yn flacmel rhywiol neu 'sextortion'.

“Mae’r troseddwyr hyn yn dibynnu ar bobl yn teimlo’n ynysig. Rydyn ni’n gofyn i rieni, gofalwyr, gwarcheidwaid a phob oedolyn yr ymddiriedir ynddyn nhw i gael sgwrs gyda phobl ifanc yn eu harddegau fel y gallan nhw droi atoch os ydyn nhw’n poeni am unrhyw beth y maen nhw’n ei weld neu ei wneud ar-lein.

“Dydyn ni ddim eisiau i unrhyw un deimlo mai nhw yw’r unig berson mae hyn wedi digwydd iddo - mae hynny ymhell o fod yn wir ac rydyn ni yma i helpu.

“Efallai ei fod yn anodd, ond ceisiwch ddod o hyd i ffordd i siarad â nhw am beryglon cyfryngau cymdeithasol.

“Anogwch nhw i stopio a meddwl os ydyn nhw'n derbyn cais ffrind gan rywun nad ydyn nhw'n ei adnabod - efallai nad ydyn nhw’r person maen nhw'n dweud ydyn nhw.”

Y cyngor i rieni yw:

• Cymerwch ddiddordeb yn y gemau a'r apiau mae eich plentyn yn eu defnyddio.
• Trafodwch beth i'w wneud os yw plentyn yn gweld cynnwys feiral sy'n eu poeni nhw.
• Siaradwch am wybodaeth bersonol a phwysigrwydd cadw'r wybodaeth hon yn breifat.

I gael cymorth a chefnogaeth, ewch i SchoolBeat.cymru

Y cyngor i bobl ifanc yn eu harddegau, os ydyn nhw'n dioddef o flacmel rhywiol neu'n derbyn ffotograffau neu gynnwys anaddas, yw:

• Peidiwch â phanicio.
• Cymerwch sgrinluniau o sgyrsiau.
• Dywedwch wrth oedolyn rydych chi’n ymddiried ynddyn nhw.
• Rhowch wybod i'r platfform cyfryngau cymdeithasol.
• Rhowch wybod i'r heddlu fel y gallan nhw ymchwilio ac atal pobl eraill rhag dod yn ddioddefwyr.

I gael rhagor o arweiniad i rieni ynglŷn â helpu plant a phobl ifanc yn eu harddegau i gadw’n ddiogel ar-lein, ewch i: https://www.getsafeonline.org/safeguarding-children/13-or-over/

Neu ewch i wefan yr NSPCC: https://www.nspcc.org.uk/preventing-abuse/child-abuse-and-neglect/child-sexual-abuse/