Rhybudd wrth i wasanaeth heddlu weld cynnydd yn nifer yr adroddiadau am dwyll

Mae Heddlu Dyfed-Powys yn rhybuddio pobl i fod yn wyliadwrus ar ôl i swyddogion sylwi ar gynnydd yn nifer yr adroddiadau am ymgais i dwyllo yn ystod y dyddiau diwethaf.

Ar ôl derbyn 11 adroddiad yn ystod y deuddydd diwethaf, er bod y bobl hyn i gyd wedi gweld mai twyll ydoedd, roedd swyddogion yn ofni y gallai rhai pobl fod wedi’u twyllo heb sylweddoli hynny.

Dywedodd y Ditectif Gwnstabl Gareth Jordan o Dîm Troseddau Economaidd Heddlu Dyfed-Powys: “Yr ydym wedi gweld cynnydd yn nifer yr adroddiadau gan bobl sy’n dweud eu bod nhw wedi derbyn galwadau ffôn gan bobl yn esgus bod yn swyddogion heddlu sy’n dweud wrthynt fod eu cerdyn credyd wedi’i glonio. 

“Yr ydym wedi derbyn 11 galwad o’r fath yn ystod y deuddydd diwethaf. Ymddengys eu bod yn targedu ardal Ceredigion.

“Does neb wedi adrodd am unrhyw golledion hyd yn hyn, ond mae’n bosibl ein bod ni ond yn clywed gan bobl sydd wedi deall mai twyll yw hyn.

“Yn aml, mae pobl ond yn sylweddoli eu bod nhw wedi dioddef trosedd o’r fath wythnosau’n ddiweddarach – pan mae’r troseddwr wedi llwyddo i’w twyllo.”

Dywedodd y Ditectif Gwnstabl Jordan bod y galwr yn dweud wrth y dioddefydd posibl ei fod yn gweithio i Dîm Twyll Arbenigol Gorsaf Heddlu Paddington neu Grîn Paddington.  

Os yw’n galw llinell dir, mae’n dweud wrth y derbynnydd i alw 999 er mwyn cadarnhau mai’r heddlu sy’n galw, ond mae’r galwr yn cadw’r llinell ar agor.

Y nod yw cael y dioddefydd i ddatgelu manylion ei gerdyn credyd, neu ei gael i dynnu arian a chael cludwr i’w gasglu (Twyll Cludwr).

Cofiwch:

• Ni fydd yr heddlu’n eich ffonio ac yn gofyn ichi am fanylion eich cerdyn debyd neu gredyd
• Ni fydd yr heddlu’n cysylltu â chi i ddweud wrthych fod eich cerdyn debyd neu gredyd wedi’i glonio
• Ni i fydd yr heddlu, neu eich banc, byth yn gofyn ichi dynnu arian neu ei drosglwyddo i gyfrif gwahanol
• Hefyd, ni fyddant byth yn gofyn ichi ddatgelu eich cyfrinair bancio llawn neu eich rhif PIN
• Galwch aelod o’r teulu neu ffrind er mwyn gwneud yn siŵr fod y llinell wedi’i chlirio, yna galwch 101 i adrodd am y digwyddiad wrth yr heddlu